Երկամաքարային հիվանդության բուժումն, ընդհանուր առմամբ, համակարգային է: Կախված հիվանդության ընթացքից` բուժման մոտեցումները տարբեր են:

Կոնսերվատիվ բուժում

Այս թերապիան բարդ է նրանով, որ հղի կնոջը հակացուցված են շատ պատրաստուկներ, որոնք արդյունավետ են երիկամաքարային հիվանդության ժամանակ: Այդ պատճառով բուժումն առավել ուղղված է ցավային ախտանիշի ճնշմանը, բորբոքային գործընթացի դեմ քարերի քայքայմանը և դուրս բերմանը:

Հղիի վիճակը թեթևացնելու համար նշանակվում են սպազմոլիտիկներ և հակաբորբոքիչներ, որոնք անվնաս են նրա համար: Բժիշկը նաև ուշադրություն է դարձնում հղի կնոջ ընդունած հեղուկների քանակին, ինչը կարևոր է միզարտադրման դրդման և թթվային ռեակցիան հիմնայինի փոխելու համար:

Ծանր դեպքերում, երբ ցավային ախտանիշը հնարավոր չէ ընդունված դեղերով հանել, ներարկվում են նարկոտիկ ցավազրկողներ, երբեմն կատարվում է արգանդի կլոր կապանի նովոկայինային պաշարում, միաժամանակ, իրականացվում է մեզի հեռացում` կաթետրի օգնությամբ:

Սննդակարգը հղի կնոջ մոտ` միզաքարային հիվանդության դեպքում

Նախքան որևէ սննդակարգ նշանակելը, հղիին պետք է հետազոտել` պարզելու երիկամներում առկա քարերի կազմությունը:

Հղի կնոջ սննդակարգի հիմնական պահանջները` երիկամաքարային հիվանդության ժամանակ

• Ուրատային քարերի ժամանակ շեշտը դրվում է բուսական սննդի վրա, կտրուկ նվազեցվում է մսի և ենթամթերքների օգտագործումը:
• Կալցիումական աղերի ժամանակ անհրաժեշտ են մսամթերք, տարբեր ձավարեղեն և մրգեր: Մասնակի պետք է պակասեցնել ձվի, կարտոֆիլի, լոբազգիների և կաթնամթերքի օգտագործումը:
• Եթե քարերի հիմքում թրթնջկաթթվի աղեր են, պետք է հրաժարվել լոլիկից, ձվից, կաթնամթերքից և լաբազգիներից:

Միզաքարային հիվանդության ցանկացած ձևի և քարերի ցանկացած կազմության դեպքում հակացուցված են սուր, աղի և ճարպոտ մթերքները:

Ցանկալի է օգտագործել գոլորշու վրա պատրաստված ոչ ճարպոտ ձուկ, միս և բուսական ծագման մթերքներ` մասնավորապես.

• ձմերուկ, սեխ, փշահաղարջ (բնական միզամուղներ),
• կաղամբ  (կարգավորում է դիուրեզը),
• լոռամրգի հյութ (միզամուղ և մանրէասպան):

Երիկամաքարային հիվանդության վիրահատական բուժումը` հղիության ժամանակ

Եթե կոնսերվատիվ բուժումն արդյունավետ չէ, երբեմն դիմում են վիրահատական միջամտության:

Իհարկե, չի բացառվում, որ այն կարող է բացասաբար ազդել հղիության ընթացքի վրա և նպաստել ակամա ընդհատմանը, բայց շատ ծանր դեպքերում երիկամաքարային հիվանդության առաջացրած վիճակը դառնում է գերակա` վիրահատության վտանգի դիմաց:

Վիրահատությունը կատարվում է անզգայացմամբ: Վիրահատության արդյունքում միզուղիներն ազատվում են առկա քարերից:

Ի՞նչ անել երիկամային խիթի ժամանակ

Երիկամաքարային հիվանդության ժամանակ հղիի մոտ սկսվում է ուժեղ ցավ: Նախքան շտապօգնության ժամանելը հարկ է սպազմոլիտիկներ օգտագործել, բայց պետք է չմոռանալ, որ ոչ բոլոր դեղերն են կարելի կիրառել հղիության ժամանակ: Առավել անվնաս են Նո-շպան, Պապավերինը, Նիտրոգլիցերինը:

Նիտրոգլիցերինը դրվում է լեզվի տակ: Պետք է նաև հետևել արտադրվող մեզի քանակին, որն անհրաժեշտ է հավաքել մաքուր տարայի մեջ՝ հետագա հետազոտության համար:

Ի՞նչ չի կարելի անել խիթի ժամանակ

• Չի կարելի ցավոտ շրջանը (մեջքը, գոտկատեղը) տաքացնել տաք ջեռակով:
• Չի կարելի տաք լոգանք ընդունել:
• Չի կարելի ընդունել դեղեր, որոնպարունակում են նարկոտիկ նյութեր:

Երիկամաքարային խիթերի կանխարգելումը:

Խիթերի կանխարգելմանը նպաստում են.

• սննդակարգը, որը որոշում է բժիշկը՝ հաշվի առնելով հիվանդության բնույթը,
• սուր, աղի, տապակած մթերքներից հրաժարումը,
• հեղուկների ընդունման կարգավորումը  (պետք է սովորություն դարձնել` օրը 2 լ ջուր օգտագործել),
• առողջ ապրելակերպ վարել. կանոնավոր մարզումներ՝ բժշկի հետ համաձայնեցված, ամենօրյա զբոսանքներ և լիարժեք քուն: