Արգանդի վզիկն այն հատվածն է, որը արգանդը միացնում է հեշտոցին:

Տարբերում ենք արգանդի վզիկի ֆոնային /առանց չարորակացման հակումի/ հետևյալ հիվանդությունները.

• Էկտոպիա
• Լեյկոպլակիա առանց ատիպիայի
• Նորագոյացություններ–պոլիպներ, կանդիլոմա

Նախաքաղցկեղային ձևերն են.

• Դիսպլազիայի երեք փուլերը
• Լեյկոպլակիան ատիպիայով
• Էրիթրոպլակիան ատիպիայով

Էկտոպիան անվանում են նաև պսևդոէրոզիա, էնդոցերվիկոզ:

Սրա դեպքում տեղի է ունենում արգանդի վզիկի ցիլինդրիկ էպիթելի աճ վզիկի հեշտոցային շրջանում: Հիմնականում ընթանում է առանց ախտանշանների և այդ դեպքում բուժում չի պահանջում: Բուժումն անհրաժեշտ է, երբ առկա է նաև բորբոքային խնդիր արյունային արտադրությամբ: Հեռացվում է էկտոպիկ շրջանը այրումով, լազերային միջամտությամբ, ռադիովիրաբուժությամբ և այլն:

Ժամանակակից բժշկությունը հակված է էկտոպիան համարելու նորմա:

Էկտրոպիոն

Էկտրոպիոնը էկտոպիայի բարդացած վիճակներից է: Այս դեպքում առաջանում է արգանդի լորձաթաղանթի արտանկում դեպի դուրս: Կարող է լինել բնածին և ձեռքբերովի:

Հաճախ այն ընթանում է աննկատ, բայց կարող է արտահայտվել նաև հետևյալ ախտանշաններով. դաշտանային ցիկլի խանգարում, ցավ որովայնի ստորին մասում և գոտկատեղում, կաթնանման արտադրություն, արյունային արտադրություն սեռական ակտի ժամանակ:

Հնարավոր են նաև ուղեկցող այլ պաթոլոգիաներ՝ լեյկոպլակիա, ցերվիկալ խողովակի էրիթրոպլակիա, ծանր դեպքերում՝ քաղցկեղ:

Լեյկոպլակիա

Այս հիվանդությունը բնորոշվում է բազմաշերտ էպիթելի բջիջների պնդությամբ. լորձաթաղանթում հայտնվում են գորշ կամ սպիտակ, ամուր, եղջրացած շրջաններ: Տարբերում ենք հասարակ, պրոլիֆերատիվ և էրոզիվ տեսակները: Պատճառներն են՝ հորմոնալ խանգարումը, արգանդի վզիկի տրավման (վնասվածք), սեռակավարակները, ձվարանների խնդիրները, էրոզիան, բորբոքային խնդիրները, վաղ սեռական կյանքը:

Հնարավոր է հիվանդության չարորակացում, այդ պատճառով այն անհապաղ բուժում է պահանջում. հեռացվում են ախտահարված շրջանները:

էրիթրոպլակիա

Էրիթրոպլակիայի դեպքում՝ բազմաշերտ էպիթելի հյուծման հետևանքով, լորձաթաղանթում ընթանում են ատրոֆիկ փոփոխություններ: Պատճառը լրիվ պարզված չէ: Այն հաճախ ընթանում է անախտանիշ: Այս հիվանդությանը հաճախ միանում են բորբոքային խնդիրներ՝ կոլպիտ և ցերվիցիտ: Եթե այն ուղեկցվում է ատիպիկ հիպերպլազիայով, դա արդեն համարվում է նախաքաղցկեղային վիճակ:

Բուժումն ուղղված է բորբոքային խնդրի վերացմանը, իսկ ատիպիկ բջիջների հայտնաբերման դեպքում՝ համապատասխան շրջանի դեստրուկցիայի իրականացում:

Պոլիպներ
Լորձաթաղանթի կարմիր կամ մանուշակագույն բարորակ գոյացություններ են:
Ախտանշաններ ոչ միշտ են դիտվում, բայց երբեմն կարող է լինել առատ դաշտան, արյունահոսություն կլիմաքսի շրջանում: էթիոլոգիան պարզ չէ:

Պոլիպները հազվադեպ՝ մեկ տոկոս դեպքերում են փոխվում չարորակ ուռուցքի: Բուժումը երկու փուլ ունի՝ վիրահատական և վերականգնողական:

Դիսպլազիա
Դիսպլազիայի ժամանակ հարթ բջջային էպիթելում դիտվում են ատիպիկ փոփոխություններ:

Այս վիճակը համարվում է նախաքաղցկեղային: Այն ունի ծանրության երեք աստիճան:

Դիսպլազիան դանդաղ է զարգանում և ժամանակին ախտորոշման դեպքում կարող է լրիվ բուժման ենթարկվել:

Արգանդի վզիկի քաղցկեղ

Քաղցկեղի տարածված տեսակներից է. վաղ հայտնաբերման դեպքում՝ բարենպաստ ելքով:

Արգանդի վզիկի հիվանդությունների ախտորոշումը

Ախտորոշման համար կատարվում են մի շարք հետազոտություններ:

Դրանցից են.

• Կոլպոսկոպիան
• Ցիտոլոգիական և հիստոլոգիական հետազոտությունները
• Արյան մեջ սեռական հորմոնների որոշումը
• Հիստերոսկոպիան
• Քսուքի անալիզը։