Ինչո՞ւ են հղիները շոգը դժվար տանում

Շոգը հղիության ցանկացած ժամկետում անբարենպաստ է կնոջ օրգանիզմի համար, ինչը տարբեր ժամկետներում արտահայտվում է տարբեր ձևով:

Առաջին եռամսյակում հնարավոր է դիտվեն զարկերակային ճնշման տատանումներ, հիմնականում՝ իջեցում, գլխապտույտներ, գլխացավեր, ուշաթափություններ, տոքսիկոզի ախտանշաններ /սրտխառնոց, հոտերի նկատմամբ` գերզգայնություն/, կարող է լինել վիժման սպառնալիք և այլն:

Երկրորդ և երրորդ եռամսյակներում, երբ` կապված սիրտանոթային համակարգի ծանրաբեռնվածության հետ, մեծանում է արյան ծավալը, կարող են լինել ընդհանուր զգացողության վատացում, ճնշման անկում, ուշաթափություններ՝ հիմնականում ոչ օդափոխվող տարածքում: Այդ եռամսյակներում շոգի ազդեցության արդյունքում կարող են դիտվել արյունահոսություններ, նորմալ տեղակայված ընկերքի վաղաժամ շերտազատում, վաղաժամ ծննդաբերություն, պտղի մոտ հիպօքսիայի նշաններ:

Երրորդ եռամսյակում, երբ արգանդի բարձր դիրքի հետ կապված` փոքրանում է թոքերի ծավալը, ստոծանին բարձրանում է. լինում են դժվարաշնչություն, սրտխփոցներ, հաճախասրտություն, հնարավոր է՝ հևոց, զարկերակային ճնշման անկում:

 Շոգ ժամանակ հղիի մոտ առավել արտահայտվում են ստորին և վերին վերջույթների այտուցները:

Ինչպե՞ս խուսափել այդ երևույթներից:

Նման երևույթներից խուսափելու համար անհրաժեշտ է օրական խմել մոտավորապես 1,5-2 լիտր ջուր, հակացուցումների բացակայության դեպքում՝ ավելի շատ:

Արևից պաշտպանվելու համար պետք է խուսափել արևի ուղիղ ճառագայթներից, կրել հղիների համար նախատեսված ներքնազգեստ, չսեղմող, բամառային կոշիկներ, դրսում լինել խիստ անհրաժեշտության դեպքում, պայուսակում անպայման ունենալ ջուր: Տանը հաճախակի օդափոխել սենյակը, օդորակիչ օգտագործել, հաճախ ցնցուղ ընդունել, լվանալ դեմքը, ձեռքերը, ոտքերը:

Այտուցներից խուսափելու կամ դրանք մեղմացնելու նպատակով երեկոյան ոտքերը պահել հորիզոնական կամ բարձր դիրքով:

Հղիների գիշերային քունը` շոգ ժամանակ

Հղին պետք է քնի մաքուր, օդափոխված սենյակում, 20˚C  ջերմաստիճանում, եթե հնարավոր է՝ բաց պատուհանով կամ օդորակիչով, որը պետք է տեղադրված չլինի անմիջապես մահճակալի վերևում, հոսքը` դեպի մահճակալ:

Անքնությունը հղիների մոտ նորմալ երևույթ է և կապված է փոքր ժամկետներում՝ հաճախամիզության, սրտխառնոցի, մեծ ժամկետներում՝ արգանդի չափերի մեծացման, պտղի խաղի, հաճախամիզության, դժվարաշնչության, ոտքերի մկանների ձգումների հետ: Անքնության պատճառ կարող է լինել նաև շոգը:

Խորհուրդներ հանգիստ քուն ապահովելու համար

Հարկ է հագնել բնական կտորից, ազատ հարմարավետ հագուստ, օգտագործել հարմար բարձեր, քնից առաջ շատ հեղուկներ չխմել, ընդունել, քնել կողքի պառկած, անհրաժեշտության դեպքում օգտագործել օդի խոնավացուցիչներ:

Կա թյուր կարծիք, որ օդորակիչները կարող են սուր ռեսպիրատոր հիվանդություններ առաջացնել, բայց, եթե դրանք ժամանակին լվացվում են, ստուգվում մասնագետի կողմից, և հղիի մահճակալը չի գտնվում օդորակիչի մոտ կամ անմիջապես նրա հոսքի տակ, նման վտանգ չի սպառնում:

Ննջարանում անհրաժեշտ է ապահովել 20-22 ˚C ջերմաստիճան, սաստիկ շոգի դեպքում՝ 23-24˚C, որպեսզի սենյակից դուրս գալիս ջերմաստճանի կտրուկ տատանումներ չլինեն:

Սենյակը պետք է հաճախ օդափոխել, ցանկալի է առավոտյան և երեխոյան զբոսնել մաքուր օդում: