Մոր և մանկան առողջության պահպանման գիտահետազոտական կենտրոն
Լուրեր | Իրավամբ՝ երջանկություն է երկար սպասված առաջնեկի լույս աշխարհ գալն ընտանիքում

Իրավամբ՝ երջանկություն է երկար սպասված առաջնեկի լույս աշխարհ գալն ընտանիքում

2016 Հուլ 17, Կիրակի

Հունվարի 5-ին Մոր և մանկան առողջության պահպանման գիտահետազոտական կենտրոնում ուրախալի լուր է գրանցվել. արտամարմնային բեղմնավորման արդյունքում միաժամանակ երկու կին մայր են դարձել: Տիկին Ալինուշն իր առաջնեկի լույս աշխարհ գալուն 10 տարի է սպասել, իսկ տիկին Հերմինեն՝ 3:
 
49-ամյա Ալինուշ Բաղդասարյանը բնակվում է Իրանում: Մեզ հետ զրույցում նա պատմել է, որ երկար տարիներ հաշվապահ է աշխատել, իսկ վերջին տարիներին հոգեհարազատ է դարձել մանկավարժի աշխատանքը:

–   Տիկին Ալինուշ, ի՞նչ զգացողություններ ունեք:
–   Աննկարագրելի… Երբ ինձ ցույց տվեցին երեխային, ես համբուրեցի նրան (հուզվում է. հեղինակ)… Տասը երկար ձգվող տարիներ ենք սպասել այս օրվան… Մի շարք դժվարություններ հաղթահարելով՝ վերջապես հասանք ցանկալի արդյունքի:

–   Փոքրիկի գալուստի առաջին հույզերն ու հաճելի  մտքերը. կկիսվե՞ք մեզ հետ:
–   Մեզ համար առաջին հերթին կարևոր էր առողջ բալիկ ունենալ: Երբ իմացանք` արու զավակ է սպասվում և պետք է լույս աշխարհ գա հունվարի 5-ին կամ 6-ին, որոշեցինք նրան Քրիստ անվանել՝ Քրիստոսի ծննդյան առթիվ: (Փոքրիկի քաշը՝ 3կգ, 80գ. է, հասակը՝ 50 սմ):

–   Ասացիք, որ տասը տարի սպասել եք Ձեր առաջնեկի լույս աշխարհ գալուն, ինչպե՞ս եք հաղթահարել «հուսահատություն» ասվածը:
–   Երբեք չեմ կորցրել հավատս՝ մայրանալ, դա ինձ ուժ է տվել, գուցե նաև հենց հավատս՝ մայրանալու, ի վերուստ պարգև է արվել…
Մի քանի անգամ հղիացել եմ, բայց ինչ-ինչ պատճառներով այն ընդհատվել է: Փառք Աստծո, որ այս անգամ ամեն ինչ բարեհաջող ընթացք ունեցավ: Հավանաբար, պատճառն այն էր, որ ստիպված էի ինքնաթիռ նստել... Այս անգամ բժիշկս խորհուրդ տվեց մնալ Հայաստանում և այստեղ անցկացնել հղիության ամողջ ընթացքը, լինել իրենց հսկողության տակ:

–  Ի՞նչ կասեք հղիության ընթացքի մասին:
–  Շնորհիվ գործին նվիրյալ բուժանձնակազմի և ուշադիր վերաբերմունքի՝ առանց դժվարությունների և անհարմար անակնկալների: Մեր ընտանիքը բնակվում է Իրանում: Այնտեղ ևս շատ ուշադիր ու լավ բժիշկներ կան, բայց այստեղ՝ Հայաստանում, հատկապես Մոր և մանկան առողջության պահպանման գիտահետազոտական կենտրոնում, չափազանց ուշադիր են կանանց հանդեպ: Շատ շնորհակալ եմ և՛ բժիշկներին, և՛ բուժքույրերին... Հատուկ շնորհակալություն Էմմա Տոտոյանին, պրոֆեսոր Գեորգի Օկոևին: Իրենց շնորհիվ է, որ հղիության ամողջ ընթացքը բարեհաջող ու անփորձանք է եղել:

–  Տիկին Ալինուշ, ի՞նչ կմաղթեք այն կանանց, ովքեր այս պահին պատրաստվում են մայրանալ:
–  Շատ կուզենամ, որ յուրաքանչյուր կին իր կյանքում վերապրի մայրության բերկրանքը: Յուրաքանչյուր ամուսնացած զույգի համար շատ կարևոր է երեխայի լույս աշխարհ գալը: Եթե կան զույգեր, ովքեր մեզ պես դժվարությունների են հանդիպել, թող  չհուսահատվեն, չվհատվեն, և ամեն ինչ լավ կլինի:
 
41-ամյա Հերմինե Դանիելյանը մասնագիտությամբ մանկավարժ է: Իր առաջնեկի լույս աշխարհ գալուն 3 տարի է սպասել:


–  Տիկին Հերմինե,  կկիսվե՞ք մեզ հետ Ձեր զգացողությունների մասին:
–  Կդժվարանամ պատմել վերապրածս զգացողությունները, բառերն աղքատ կգտնվեն, այն միայն ապրել ու զգալ է պետք (հուզվում է. հեղինակ)… Անչափ շնորհակալ եմ «Արագիլ» բարեգործական հիմնադրամին, հանձինս՝ Առաջին տիկին Ռիտա Սարգսյանին, ում հովանավորությամբ է կատարվել Մոր և մանկան առողջության պահպանման գիտահետազոտական կենտրոնում արտամարմնային բեղմանավորումը: Շնորհակալ եմ պրոֆեսոր Գեորգի Օկոևին, շնորհակալ եմ կենտրոնի բուժանձնակազմին:

–  Քանի՞ տարի եք սպասել այս օրվան:
–  Երեք տարի… Արդյունքում ունեցանք մեր սպասված և ցանկալի բալիկին՝ ի շնորհիվ այն բժիշկների, ովքեր աշխատեցին մեզ հետ՝  արտամարմնային հղիության բաժանմունքում:  Վստահ և համոզված եմ եղել, որ առաջին իսկ փորձից ամեն ինչ ստացվելու է՝ պրոֆեսոր Օկոևի օգնությամբ: Եվ ահա. 9 ամիս անց ծնվեց մեր առաջնեկը:
 
–  Ինչպե՞ս անցավ հղիության ընթացքը:
–  Ամեն ինչ բարեհաջող է անցել, որևէ խնդիր չի եղել: Միշտ եղել եմ բժիշկների հսկողության տակ, ովքեր ուշադիր են եղել իմ հանդեպ, զգացված եմ հոգատար վերաբերմունքի համար:

–  Դուք աղջիկ եք ունեցել. փոքրիկի գալուստի առաջին հույզերը…
–  Փոքրիկի սեռը մեզ համար էական չէր, մեզ մտահոգում էր՝ առողջ բալիկ ունենալ: Ի սկզբանէ որոշել էինք. եթե աղջիկ ունենանք, կկրի ամուսնուս մոր անունը: Մեր փոքրիկի անունը Նոնա է: (Փոքրիկի քաշը՝ 3կգ, 950գ. է, հասակը՝ 54 սմ):

–  Ձեր բարեմաղթանքը ապագա մայրերին:
–  Երբեք ոչնչից չվախենան, հավատան, որ ամեն ինչ լավ է լինելու: Արդյունքում կունենան առողջ և երջանիկ բալիկ:

+374 10 53 13 42

Վերջին թարմացումներ

Կարդալ ավելին»
2020 Փետ 28, Ուրբաթ | Լուրեր

Ապրիլի 8-ին, 9-ին և 10-ին Հայաստանում է պրոֆեսոր Հերվե Ֆերնանդեզը

Հանրահայտ ֆրանսիացի բժիշկ, Փարիզի «Կրեմլին-Բիսետրե» համալսարանականկլինիկայի պրոֆեսոր Հերվե Ֆերնանդեզը կրկին անգամ կժամանի Մոր և մանկան առողջության պահպանման գիտահետազոտական կենտրոն: Ապրիլի8-ին, 9-ին և 10-ին պրոֆեսոր Ֆերնանդեզը...

Կարդալ ավելին»
Կարդալ ավելին»
2020 Փետ 24, Երկուշաբթի | Պացիենտների համար

Անոթների դուպլեքս հետազոտություն

դուպլեքս սկանավորումը ուլտրաձայնային հետազոտություն է, որը հնարավորություն է տալիս գնահատել երակային և զարկերակային անոթների անցանելիությունը, արյան շրջանառության ցուցանիշները...

Կարդալ ավելին»
Կարդալ ավելին»
2019 Դեկ 12, Հինգշաբթի | Մասնագետների համար

Դաշտանադադարային համախտանիշի առանձնահատկությունները ոսկրերի հանքային խտության տարբեր մեծություններով կանանց մոտ

Դաշտանադադարը (ԴԴ) ֆիզիոլոգիական շրջան է, որի ընթացքում կնոջ օրգանիզմի ընդհանուր տարիքային փոփոխությունների ֆոնի վրա տեղի են ունենում կնոջ վերարտադրողական...

Կարդալ ավելին»

Մոր և մանկան առողջության պահպանման գիտահետազոտական կենտրոն

Հետևե՛ք մեզ

Սոցցանցերում

Կապ

Խորհրդատվություն