Սիրելի՛ հայրենակիցներ,
Ամանորի և Սուրբ Ծննդյան նախօրեին Մոր և մանկան առողջության պահպանման գիտահետազոտական կենտրոնն իր սրտի խոսքն է հղում ամբողջ հայությանը.

Անցնող 2020թ. ծանր փորձությունների տարի էր ամբողջ աշխարհի համար, իսկ մեր ժողովրդի համար՝ նաև ողբերգական: Այսօր մենք դառը կսկիծով ենք վերհիշում արցախյան դաժան պատերազմի օրերին զոհված հազարավոր քաջարի ու հերոս զինվորներին, կամավորագրված ազատամարտիկներին, իրենց օջախները պաշտպանող արցախի բնակչությանը:

Մարտի դաշտում վիրավորվածներին ցանկանում ենք շուտափույթ առողջացում և խաղաղ երկինք: Պետք է նաև առանձնահատուկ նշել բուժաշխատողների անձնուրաց աշխատանքը, որոնք առանց հանգստի, օրուգիշեր փրկում էին հազարավոր կյանքեր:

Ուզում ենք նաև նշել Սփյուռքում ապրող մեր հայրենակցների ջերմ աջակցությունն ու անշահախնդիր օգնությունը:

Մեր կորուստներն այս տարի շատ էին: Մի կողմից Ադրբեջանի և Թուրքիայի սանձազերծած պատերազմն Արցախում, մյուս կողմից` կորոնավիրուսային համավարակը, որի պատճառով մենք կորցրեցինք մեր շատ ու շատ հայրենակիցների, ինչը ևս ծանր հարված էր մեր ժողովրդի համար:

Ցավոք, այս ամենը տեղի է ունենում ներքաղաքական շատ բարդ իրավիճակում, երբ կշեռքի նժարին է դրված ոչ միայն արցախյան տարածքների նորանոր կորուստների հարցը. տարածքներ, որոնք անկախության առաջին իսկ տարիներին ձեռք բերվեցին բազմաթիվ զոհերի և զրկանքների գնով, այլ նաև հայոց պետականության, մեր իսկ լինել-չլինելու հարցը:

Եվ այսօր կենտրոնի ղեկավարությունն ու բուժանձնակազմը հուսով է, որ մեր ժողովրդի խոհեմությունը, ի վերջո, կհաղթանակի, կգտնվի այն լավագույն ուղին, որն այս ծանր իրավիճակից դուրս կբերի երկիրը, ու կապահովի հայ ժողովրդի անվտանգությունն ու հետագա բարեկեցությունը թեʹ Հայաստանում, և թեʹ Արցախում:

Թող գալիք` 2021 թվականը, բերի խաղաղություն աշխարհին, խաղաղություն ձեր ընտանիքներին, խաղաղություն  բոլորիս:
Աստված բոլորիս պահապան: