Մոր և մանկան առողջության պահպանման գիտահետազոտական կենտրոն / Ալկոհոլի օգտագործումը հղիության ընթացքում

Ալկոհոլի օգտագործումը շարունակում է մնալ հանրային առողջության հիմնական խնդիրներից մեկը, ինչն արդի է նաև Հայաստանում, այդ թվում նաև կանանց շրջանում: Պաշտոնական վիճակագրության համաձայն, ալկոհոլային խմիչքի օգտագործումը կանանց շրջանում սկսել է «երիտասարդանալ» և ներկայում կանանց կեսից ավելին՝ 52.8%-ը, միջին հաշվով որևէ առիթով օգտագործում է մինչև 1 չափաբաժին ալկոհոլ: Հետևաբար, հղիության և հետծննդյան շրջանում ալկոհոլի օգտագործման վտանգների վերաբերյալ իրազեկված լինելը կարևոր է Ձեզ և Ձեր երեխային պաշտպանելու տեսանկյունից:

Հարկ է ընդգծել, որ հղիության կամ հղիության պլանավորման ընթացքում ալկոհոլի օգտագործման անվտանգ և թույլատրելի չափաբաժին գոյություն չունի: Ալկոհոլի բոլոր տեսակները հավասարապես վնասակար են, ներառյալ բոլոր տեսակի գինիները և գարեջուրը:

Պտղի մոտ ալկոհոլի ազդեցության հետևանքով առաջացող հնարավոր խանգարումները կանխարգելելի են, եթե երեխան մինչև ծնվելը չի ենթարկվում ալկոհոլի բացասական ազդեցությանը:

Ինչու՞ է ալկոհոլը վտանգավոր

Մոր արյան մեջ թափանցած ալկոհոլը պտղին անցնում է պորտալարի միջոցով։ Հղիության ընթացքում ալկոհոլի օգտագործումը կարող է հանգեցնել այնպիսի անցանկալի հետևանքների, ինչպիսիք են վիժումը, մեռելածնությունը և մի շարք ֆիզիկական, վարքային և մտավոր խանգարումներ, որոնք կարող են ուղեկցել ապագա երեխային ամբողջ կյանքի ընթացքում: Այս ախտաբանությունը հայտնի է որպես պտղի ալկոհոլային սպեկտորի խանգարումներ (FASDs):

Պտղի ալկոհոլային սպեկտորի խանգարումներ ունեցող երեխաները կարող են ունենալ հետևյալ բնութագրերը և վարքագծային խանգարումները․
ոչ նորմալ դիմագծեր, օրինակ, քթի և վերին շուրթի միջև հարթված թմբիկներ,
գլխի փոքր չափս,
կարճահասակություն,
ցածր մարմնի զանգվածի ինդեքս,
կոորդինացիայի դժվարացում,
գերակտիվ վարքագիծ,
ուշադրության կենտրոնացման դժվարացում,
վատ հիշողություն,
դպրոցում ուսանելիության դժվարացում (հատկապես մաթեմատիկայից),
սովորելու դժվարություն,
լեզվական և խոսքի զարգացման հապաղում,
ինտելեկտի թուլություն (ցածր IQ),
ցածր ճանաչողական և դատողական հմտություններ,
քնի և ծծողական ռեֆլեքսի խանգարումներ,
տեսողական և լսողական խնդիրներ,
խնդիրներ՝ կապված սրտի, երիկամների և ոսկրային համակարգի հետ: