Փետրվարի 23-ին Մոր և մանկան առողջության պահպանման ԳՀԿ-ում (ՄՄԱՊԳՀԿ) տեղի ունեցավ «Զարգացման բնածին արատների գենետիկան» թեմայով դասախոսությունը, որի շրջանակում ելույթներով հանդես եկան Բժշկական գենետիկայի և առողջության առաջնային պահպանման․․․ կենտրոնի (ԳԱԱՊԿ) մասնագետները՝ փոխտնօրեն, գենետիկ, կ․գ․թ․ Դավիթ Բաբիկյանը, բջջագենետիկ Ալին Այվազը, բժիշկ-գենետիկ Նաթելլա Կոստանդյանը։

 Նրանք ներկայացրեցին Բժշկական գենետիկայի կենտրոնում իրականացվող պրենատալ (նախածննդյան և նեոնատալ) ախտորոշման տեսակները, կիսվեցին ուշագրավ կլինիկական դեպքերի փորձով, որոնց հիմքում եղել են բնածին արատների, սպոնտան վիժումների, հղիության կրկնվող ընդահատումների և ժառանգական այլ հիվանդությունների հետ կապված խնդիրներ։

Դասախոսության ընթացքում ՄՄԱՊԳՀԿ կլինիկայի ղեկավար, բ․գ․դ․, պրոֆեսոր Արմեն Բլբուլյանն իր ելույթում ընդգծեց, որ առաջիկայում Մոր և մանկան առողջության պահպանման գիտահետազոտական կենտրոնը գործակցության նոր եզրեր կգտնի Բժշկական գենետիկայի և առողջության առաջնային պահպանման կենտրոնի հետ և համատեղ մի շարք նախագծեր կիրականացվեն։ Նա նշեց, որ մասնագիտական նման հանդիպումները գենետիկներին ու մանկաբարձ-գինեկոլոգներին հնարավորություն կտան ավելի սերտորեն համագործակցել և ծանոթանալ գենետիկ ախտորոշման վերջին նորություններին, և ամենակարևորը, դրանք կիրառել ամենօրյա գործնական աշխատանքում։

«Այսօր արդեն հղիության հետ կապված հսկողությունը մեկ մասնագետի հարց չէ, դա պետք է լինի տարբեր մասնագետների տանդեմ։ Միասին կարող ենք ավելի առողջ սերունդ ունենալ»,- վերջում իր խոսքն այսպես ավարտեց Նաթելլա Կոստանդյանը։