Ուլտրաձայնային հետազոտության դիմելիս, հղիները, սովորաբար, անհանգստանում են` արդյո՞ք դա չի վնասի ապագա փոքրիկին:

Ուլտրաձայնի ամերիկյան ինստիտուտի կատարած հետազոտությունները հաստատել են ուլտրաձայնի անվտանգությունը հղիության վաղ շրջանում: Հետազոտությունների ընթացքում կաթնասունների օրգանիզմում չի հայտնաբերվել ուլտրաձայնով ճառագայթման արդյունքում որևէ հյուսվածքային կամ բջջային փոփոխություն: Այդ մեթոդի կիրառման 20-ից ավելի տարիներում հղիների մոտ պտղի կողմից որևէ բարդության մասին տվյալ չի դիտվել:

Ուլտրաձայնային հետազոտությունը հնարավորություն է տալիս ո՛չ միայն արձանագրել հղիությունը, այլ նաև հետևել էմբրիոնի աճի և զարգացման գործընթացներին, ժամանակին հայտնաբերել մահացած պտուղը, արտարգանդային հղիությունը, պարզել արյունային արտադրությունների պատճառը, քրոմոսոմային ախտաբանության առկայությունը պտղի մոտ (օրինակ, Դաունի հիվանդությունը): Ուլտրաձայնային հետազոտությունը միակ մեթոդն է, որը թույլ է տալիս հայտնաբերել պտղի զարգացման արատները:

Կարևոր է հետազոտությունն անցկացնել հղիության 10-13-րդ շաբաթից, քանի որ մինչև 10 շաբաթականն էմբրիոնի չափերը 3 սմ-ից պակաս են ու հնարավոր չէ գնահատել պտղի օրգանների անատոմիական կառուցվածքը` նույնիսկ ամենանորագույն սարքով: 10 շաբաթականից հետո արդեն կարող են ախտորոշել պտղի մոտ առկա արտահայտված արատները, որոնք անհամատեղելի են կյանքի հետ կամ խորը հաշմանդամություն են առաջացնում: Իսկ հղիության ընդհատումն առավել վաղ ժամկետներում, բնականաբար, ավելի քիչ տրավմատիկ է, քան երկրորդ եռամսյակում` արատները հայտնաբերելուց հետո:

10-13-րդ շաբաթականից սկսած, հնարավոր է հայտնաբերել պտղի քրոմոսոմային ախտաբանության ուլտրաձայնային մարկերները՝ պտղի օձիքային տարածության հաստության մեծացումը և քթոսկրի բացակայությունը:

Պտղի օձիքային տարածության հաստությունը պտղի մաշկի և փափուկ հյուսվածքների միջև եղած շրջանի չափն է, որը շրջապատում է ողնաշարի պարանոցային հատվածը: Օձիքային տարածությունը դիտվում է պտղի մոտ ինչպես նորմայում, այնպես էլ քրոմոսոմային հիվանդությունների ժամանակ (օրինակ, Դաունի հիվանդություն), բայց քրոմոսոմային հիվանդություններին բնորոշ է օձիքային տարածության հաստացում 2,5 մմ-ից ավելի: Օձիքային տարածությունը բոլոր պտուղների մոտ ինքնուրույն անհետանում է հղիության 14-րդ շաբաթից հետո, այդ պատճառով շատ կարևոր է հետազոտությունը կատարել 10-13 –րդ շաբաթներում, երբ դեռ այն հնարավոր է չափել: Քթոսկրը նորմայում այս հետազոտությամբ  դիտարկվում է հղիության 10-րդ շաբաթից:

Քրոմոսոմային ախտաբանությամբ պտղի մոտ ոսկրացման գործընթացներն ավելի ուշ են ընթանում, այդ պատճառով, ուլտրաձայնային հետազոտության ժամանակ այդ ժամկետում քթոսկրի բացակայությունը պտղի քրոմոսոմային ախտաբանության նշան է:

Ուլտրաձայնային հետազոտությունը՝ համակցված մոր արյան մեջ պտղի սպիտակուցների խտության որոշման հետ, ներկայում Դաունի կամ այլ քրոմոսոմային հիվանդություններով երեխայի աշխարհ գալու կանխատեսման առավել արդյունավետ միջոց է: