Այսօր Մոր և մանկան առողջության պահպանման ԳՀԿ-ում «Մաքուր ձեռքերը կյանքեր են փրկում» խորագրով հերթական միջոցառումն էր, որը նշվում է ամեն տարի մայիսի 5-ին  ԱՀԿ-ի կողմից հայտարարված Clean hands, save lives կարգախոսի ներքո: Միջոցառման ընթացքում ներկայացվեցին կենտրոնի ձեռքբերումները և անելիքները, բաժանմունքների ավագ բուժքույրերն ու մանկաբարձուհիները ներկայացրեցին խնդիրները, կիսվեցին հաջողված փորձով:

Նորածնային բաժանմունքի ավագ բուժքույր Նաիրա Մկրտչայնը նշեց, որ վարակի հսկողության այս կարևոր բաղադրիչը խիստ արդիական է հատկապես նորածնային ինտենսիվ թերապիայի բաժանմունքում, որտեղի բուժառուները առավել խոցելի են անգամ ոչ ախտածին մանրէների նկատմամբ:

Գինեկոլոգիական բաժանմունքի ավագ բուժքույր Սյուզաննա Աբրահամյանը կարևորեց սրտացավությունը և հիվանդի նկատմամբ կարեկից վերաբերմունքը, որից բխում են նաև աշխատանքի պարտաճանաչությունը և զգոնությունը:

Մանկաբարձական բաժանմունքի ավագ մանկաբարձուհի Արմիդա Չինարյանը շնորհավորեց ներկաներին մանկաբարձուհիների օրվա կապակցությամբ, ընդգծելով մասնագիտական հմտությունների կարևորությունը հատկապես այս ոլորտում:

Պոլիկլինիկական ծառայության ավագ մանկաբարձուհի Աննա Ղալեչյանը կիսվեց իր բաժանմունքի ձեռքբերումներով:

Համաճարակաբանի օգնական Լիանա Պետրոսյանը ներկայացրեց ձեռնոցների կիրառման բուրգը, դրանց առավելություններն ու թերությունները:

Միջոցառման ավարտին ներկաներին ներկայացվեց մանրէազերծ ձեռնոցների կիրառման տեխնիկան և հատուկ լուսային սարքի միջոցով ստուգվեց ձեռքերի մաքրությունը: