Արգանդի փողերը կանանց ամենակարևոր օրգաններից են, որոնց գործունեության խաթարումը կարող է հղիության համար արգելք դառնալ:

Նրանց անանցանելիությունը անպտղության ամենահաճախ հանդիպող պատճառներից է: Այս ախտաբանությունը կարող է արտաքին և կլինիկական որևէ արտահայտություն չունենալ: Միակը՝ հղիության բացակայությունն է:

Պատճառները և ախտանշանները

Փողերի հետ կապված ախտաբանությունը դիտարկվում է որպես կանանց վերականգնողական համակարգի հիվանդությունների հետևանք։

Փողերի ախտաբանության պատճառներից են.

• վերականգնողական համակարգի նախկինում տարած կամ առկա քրոնիկ բորբոքային հիվանդությունները,
• գինեկոլոգիական հիվանդությունները և միջամտությունները (հղիության արհեստական ընդհատում, նորագոյացության հեռացում),
• ներարգանդային պարույրի երկարատև կրումը, կամ սխալ տեղադրումը,
• էնդոմետրիոզը (արգանդի ներքին էպիթելի ախտաբանական աճ),
• ուռուցքները, կիստաները, պոլիպները՝ վերականգնողական կամ հարևան օրգաններում, որոնց պատճառով սեղմվում են փողերը,
• կպումների առկայությունը, ներառյալ՝ հիդրոսալպինքսը,
• բնածին ախտաբանությունը։

Տարբերում են փողերի անանցանելիության երկու տեսակ.

• Միակողմանի կամ մասնակի, երբ ախտաբանական փոփոխությունները միայն մեկ փողի սահմաններում են: Այս դեպքում հղիության հնարավորությունը նվազում է 50 տոկոսով:
• Երկկողմանի կամ լրիվ․ այս դեպքում ախտորոշվում է որպես անպտղության փողային գործոն։

Փողերի անանցանելիությանը բնորոշ են հետևյալ նշանները.

• Անպտղություն,
• արտարգանդային հղիություն,
• ցավ՝ որովայնում,
• ցավոտ, ոչ կանոնավոր դաշտան։

Շատ դեպքերում, երբ վարակը դառնում է քրոնիկ, արգանդի փողերի անանցանելիության ախտանշաններ չեն դիտվում: Բուժառուն տարիներ շարունակ կարող է այդ մասին չիմանալ, եթե հղիություն չի պլանավորում:

Ախտորոշումը

Ախտորոշման և անբավարարության աստիճանը որոշելու և ուղեկցող հիվանդությունները հայտնաբերելու նպատակով գինեկոլոգը նշանակում է հատուկ հետազոտություններ:

Հիմնական հետազոտություններն են.

• Էխոհիստերոսալպինգոսկոպիա․ ՈՒՁՀ օգնությամբ հետազոտության կոնտրաստ մեթոդ է, երբ փողերի մեջ հատուկ հեղուկ է ներմուծվում
• ախտորոշիչ լապարոսկոպիա։

Բուժումը

Բուժման ժամանակ հաշվի է առնվում ախտաբանության պատճառը, արտահայտման աստիճանը, բուժառուի վերարտադրողական պլանները և տարիքը:

Բուժումն իրականացվում է հետևյալ միջոցներով.

• դեղորայքային․ հակաբորբոքիչ, հակաբակտերիալ, հորմոնալ դեղեր,
• վիրահատական միջամտություն․ լապարոսկոպիա

Եթե կոնսերվատիվ և վիրահատական մեթոդները ցանկալի արդյունք չեն տալիս և հղիություն չի զարգանում, առաջարկվում է ԱՄԲ: