Համաձայն պաշտոնական տվյալների, Հայաստանում արձանագրվում է սուր շնչառական վարակներով հիվանդացության աճ, որոնցից առանձնահատուկ ուշադրության է արժանի սեզոնային գրիպը (շրջանառվում են H1N1, H3N2 և այլ տեսակներ)։

Հայտնի է, որ գրիպի ծանր ընթացքի և հոսպիտալացման հավանականությունն ավելի բարձր է հղիների և հետծննդյան շրջանում գտնվող կանանց մոտ՝ հղիության ընթացքում իմունային և այլ օրգան-համակարգերում տեղի ունեցող փոփոխությունների հետևանքով:

Գրիպի ախտանշանները, սովորաբար, սկսվում են վիրուսով վարակվելուց մոտավորապես 2 օր անց և ներառում են․

• ջերմության հանկարծակի բարձրացում,
• հազ (սովորաբար՝ չոր),
• գլխացավ,
• մկանային և հոդային ցավեր,
• վատ ինքնազգացողություն,
• կոկորդի ցավ,
• քթահոսություն:

Գրիպի առաջին իսկ ախտանշանների ի հայտ գալուն պես խորհուրդ է տրվում դիմել հսկող բժշկին և ոչ մի դեպքում չզբաղվել ինքնաբուժմամբ, քանի որ հղիների մոտ, որպես ամենավտանգավոր բարդություն, կարող է զարգանալ սուր շնչառական անբավարարություն։

Նյութը պատրաստվել է ԱՀԿ և ԱՄՆ ՀՎԿԿ տվյալների հիման վրա։