Երեխաների առողջական խնդիրների հարցում առաջնահերթ տեղ է գրավում նորածինների սնուցումը: Վաղ մանկական տարիքում լավագույն առողջապահական խնամքի և համապատասխան սնուցման ապահովումը ենթադրում է մանկան կյանքի լավագույն սկզբի երաշխավորում: Բազմաթիվ հետազոտություններով փաստված է, որ հետագա կյանքի ընթացքում առողջական ռիսկերը ձևավորվում են մանկության և դեռահասության շրջանում: Այդ պատճառով խիստ կարևոր է, որ երեխաների սնուցումը կյանքի առաջին 6 ամսվա ընթացքում իրականացվի բացառապես կրծքով:

Մոր և մանկան առողջության պահպանման գիտահետազոտական կենտրոնը 20 տարի շարունակ՝ կրելով «Մանկան բարեկամ ծննդատուն» կոչումը, խրախուսելով կրծքով սնուցման քաղաքականությունը, մշտապես իրականացնում և մասնակցում  է «Կրծքով կերակրման խորհրդատվություն» դասընթացներին:

Այս դասընթացների շրջանակում  Մոր և մանկան առողջության պահպանման ԳՀԿ-ում մասնակիցները ձեռք են բերել  ինչպես տեսական, այնպես էլ գործնական  գիտելիքներ:

Դասընթացը վարել է Հասմիկ Լալայանը, իսկ ծննդատան կրծքով կերակրման քաղաքականությանը ծանոթացրել են նորածնային բաժանմունքի վարիչ՝ Անաիդա Ասատրյանը և ծննդատան կրծքով  կերակրման խորհրդատու՝ բուժքույր Մարիաննա Հովհաննիսյանը: