Մոր և մանկան առողջության պահպանման գիտահետազոտական կենտրոնում մեկնարկել է «Արտասեռային հիվանդություններ և հղիություն» թեմայով սեմինարների շարքը։

Ապրիլի 4-ին զեկուցումներով հանդես եկան ՄԱԿ ուսումնական կենտրոնի ղեկավար, ՄՎՀԱ նախագահ, ՀՀ ԱՆ Այրվածքաբանության և մաշկաբանության ազգային կենտրոնի մաշկավեներաբան Կարեն Վարդանյանը և նույն կենտրոնի սեռավարակների բաժանմունքի վարիչ, ՄՎՀԱ գիտական խորհրդի ղեկավար Էմիլ Միրզոյանը։

Հանդիպման ընթացքում համակողմանի քննարկվեցին թեմաներ՝ նվիրված հղիության դերմատոզներին և սիֆիլիսին։

«Գտնվելով մանկաբարձ-գինեկոլոգների թիրախային լսարանում՝ հանդես եկա զեկուցումներով, որի ժամանակ խոսեցի հղիության դերմատոզների մասին, որոնց մի մասը հազվադեպ հանդիպող են, մյուսները՝ ավելի հաճախ, բայց, ցավոք, Հայաստանում դեռ վիճակագրություն չունեցող և չարձանագրվող խնդիրներ են։ Մանկաբարձ-գինեկոլոգների ուշադրությունը հրավիրեցի տվյալ խնդրին՝ ունենալով երկու նպատակ։ Նախ՝ պետք է արձանագրել և ունենալ հայաստանյան վիճակագրություն։ Երկրորդ՝ ոչ պակաս կարևոր խնդիրը, հղիների առողջական վիճակի  բարելավումն է, հնարավոր ռիսկերի կառավարումն ու վերահսկումը»,- ասել է Կարեն Վարդանյանը։     

«Իմ զեկուցման մեջ ներկայացրի վիճակագրական տվյալներ՝ամբողջ աշխարհում սիֆիլիսի տարածվածության մասին։ Թվերը գնալով աճում են։ Օրինակ, ԱՄՆ-ում  2023 թվականին գրանցվել է 200,000 դեպք։

Վերջին 70 տարվա ընթացքում նման ցուցանիշ չի եղել։ Բարձր են եղել թվերը նաև ՌԴ-ում։ Հայաստանում էլ քայլեր են կատարվում հիվանդության բացահայտման և գրանցման ուղղությամբ։

Ներկայացրեցի նաև մեր կատարած աշխատանքը ռիսկի խմբերի հետ, քանի որ այդ խմբում գտնվող անձինք ավելի հաճախ են վարակվում սիֆիլիսով, ուստի առավել ուշադրության կարիք կա։ Խոսեցի սեռավարակի փոխանցման, առաջնային, երկրորդային, երրորդային դրսևորումների մասին։ Անդրադարձա ախտորոշման և բուժման հարցերին։ Ուշադրություն հրավիրեցի նաև լաբորատոր օղակի ճիշտ աշխատանքի կարևորության վրա»,- նշել է Էմիլ Միրզոյանը։