Նյութափոխանակությանը ինսուլինի մասնակցության խանգարումը  լուրջ խնդիր է, որը կարող է հանգեցնել տարբեր բարդությունների։

Այս մասին մայիսի 16-ին «Մարգարյան ծննդատուն» ՄՄԱՊԳՀԿ կոնֆերանսների դահլիճում  «Ինսուլինառեզիստենտականություն» թեմայով կայացած դասախոսության ժամանակ ասաց էնդոկրինոլոգ, բ․գ․թ․ Հայկ Ազարյանը:

Նրա փոխանցմամբ՝  այն կարող է ունենալ տարբեր հետևանքներ՝ հանգեցնելով  գիրության, լյարդի վնասման և, ի վերջո, մետաբոլիկ համախտանիշի զարգացման։ Այս  պայմաններն, իրենց հերթին, կարող են մեծացնել սրտի և այլ  օրգան-համակարգերի կողմից լուրջ հիվանդությունների զարգացման ռիսկը:

Հայկ Ազարյանն ընդգծեց, որ ամեն տարի այս հիվանդությունների արդյունքում զարգացող բարդություններից մահանում է մոտավորապես 5 մլն մարդ ամբողջ աշխարհում , որոնցից ամենատարածվածը ճարպակալումն է, ինչը հաճախ կապված է ոչ առողջ սնվելու հետ, ներառյալ՝ սննդակարգում արագ յուրացվող ածխաջրատների մեծ քանակը:

Հարկ է հետևել սննդակարգին, լինել ֆիզիկապես ակտիվ, նվազեցնել  արագ յուրացվող ածխաջրատների օգտագործման քանակը, ավելի շատ օգտագործել բջջանք (օրինակ՝ բանջարեղեն)։