«Մարգարյան ծննդատուն» ՄՄԱՊԳՀԿ-ում կրկին բացվեցին «Մայրության դպրոցի» դռները, և օրերս կայացավ կարևոր գիտելիքով լի առաջին դասը։ Դպրոցի ղեկավարը՝ մանկաբարձ-գինեկոլոգ Արմինե Խանամիրյանը, հպարտությամբ հայտնում է, որ մասնակիցների առաջին խումբն արդեն համալրվել է, և սա առանձնահատուկ պահ է նրանցից յուրաքանչյուրի համար։

 - Այս նախագիծը սկսվեց մայրությանը պատրաստվելու կարևորության խորը ըմբռնմամբ: Մենք ձգտում ենք ո՛չ միայն տեղեկատվություն փոխանցել հղիության և ծննդաբերության ֆիզիոլոգիական ասպեկտների մասին, այլ նաև ստեղծել փորձի փոխանակման և աջակցության տարածք: Ի վերջո, մայր լինելը կնոջ կյանքում ամենանշանակալից ու գեղեցիկ իրադարձություններից է։

Այստեղ կանայք կարող են ստանալ իրենց բոլոր հարցերի պատասխանները՝ սկսած նախածննդյան խնամքից մինչև հետծննդյան խնամք, ինչպես նաև կրծքով կերակրման հետ կապված հարցեր:

Մեր դասընթացները վարում են գինեկոլոգներ, հոգեբաններ, լակտացիայի մասնագետներ, անեսթեզիոլոգներ և այլ մասնագետներ: Ուսուցման ցիկլը բաղկացած է 7 դասից, որոնք կտրամադրեն տեսական և գործնական գիտելիքներ։ Դասընթացն անվճար է, գրանցումը հասանելի է մեր պաշտոնական կայքում։ Ի դեպ, ցանկության դեպքում, տղամարդիկ նույնպես կարող են հաճախել դպրոցի դասերին։ Ուսուցումը կլինի ո՛չ միայն օգտակար, այլև` հետաքրքիր։

«Մարգարյան ծննդատուն» ՄՄԱՊԳՀԿ  հոգեբան Ռուդոլֆ Բեգլարյանը համոզված է, որ ապագա մայրիկների համար դպրոցի բացումը մեծ նշանակություն ունի և՛ ֆիզիկական պատրաստվածության, և՛ կանանց մոտ մայրության հոգեբանական պատրաստվածության համար։

- Որպես հոգեբան՝ կարող եմ հաստատել, որ յուրաքանչյուր կնոջ համար, անկախ նրանից՝ առաջին հղիությունն է, թե պլանավորում է հղիանալ, որակյալ մասնագետներից գիտելիք ստանալը առանցքային դեր ունի։ Ուստի ապագա մայրերի դպրոցը դառնում է չափազանց կարևոր ռեսուրս։

Հղիության ընթացքում հաճախ են հարցեր ծագում, և կանայք տարբեր անհանգստություններ ու վախեր են ունենում։ Մենք առաջարկում ենք անհատական ​​մոտեցում յուրաքանչյուր կնոջ, բացի խմբակային դասերից, նրանց հարցերը մշտապես լուծելու համար:

«Մայրության դպրոց»-ի դասընթացի մասնակից Անուշիկ Ալավերդյանը նշում է․

- Սա իմ առաջին հղիությունն է, որին նախապատրաստվում էինք երեք տարի։ Երբ իմացա իմ օրհնության մասին, սկսեցի ապագա մայրերի համար հարմար դպրոց փնտրել: Ծննդատան կայքում տեսա գովազդ և անմիջապես որոշեցի այցելել այս դպրոց։ Համացանցում շատ հակասական տեղեկություններ կան, բայց ես ճշգրիտ պատասխանների կարիք ունեմ։

Բնույթով անհանգիստ մարդ եմ` հատկապես հղիության ժամանակ, երբ կարող են սթրեսներ ու ցավեր լինել։ Վստահ եմ, որ այս դպրոցի շնորհիվ կունենամ իմ բոլոր հարցերի պատասխանները։ Ապագա մայրերին խորհուրդ եմ տալիս ուշադրություն դարձնել այս հնարավորությանը։

«Մայրության դպրոց»-ի դասընթացի մասնակից Անուշ Հակոբյանն անկեղծանում է․

- Մասնագիտությամբ մանկավարժ եմ, և սա իմ երկրորդ հղիությունն է։ Առաջին անգամ շատ հարցեր ունեի, որոնցից մի քանիսի պատասխանները ինքնուրույն գտա: Այնուամենայնիվ, կան բազմաթիվ հարցեր, որոնց վերաբերյալ կցանկանայի լսել մասնագետի կարծիքը։

Ինձ հատկապես հետաքրքրում են կրծքով կերակրման և երեխայի սնուցման ասպեկտները` վաղ փուլերում: Հուսով եմ, որ Մայրության դպրոցում ես կկարողանամ ստանալ բոլոր անհրաժեշտ պատասխանները որակյալ մասնագետներից։ Սա չափազանց կարևոր է ինձ համար: