Մարգարյան ծննդատանը կայացավ երրորդ սեմինարը` կրծքով կերակրման վերաբերյալ։ Այս սեմինարների ընթացքում մեր ծննդատան առաջատար մասանգետները ո՛չ միայն գործընկերների հետ կիսում են տեսական գիտելիքները, այլ նաև սովորեցնում են գործնական հմտություններ:

Կրծքով  կերակրման խորհրդատու, բուժքույր Մարիաննա Հովհաննիսյանը վստահ է, որ նման միջոցառումները զգալիորեն օգնում են յուրացնել կրծքով կերակրման հմտությունները և նպաստում բուժաշխատողների մասնագիտական մակարդակի բարձրացմանը:

«Քննարկեցինք, թե ինչպե՞ս պետք է լակտացիայի խորհրդատուն կարգավորի ծագած խնդիրները, և ի՞նչ հմտություններ ու տեխնիկա պետք է ունենա մասնագետը՝ կանանց ճիշտ խորհրդատվություն տրամադրելու համար:

Հիմնական թեման կրծքով կերակրման խնդիրների վերանայումն էր, որպեսզի բուժաշխատողը կարողանա տարբերակել ճիշտ և սխալ մոտեցումներն ու տեղյակ լինի այս գործընթացի բարդություններին:

Քննարկման կիզակետում էին կերակրման ճիշտ դիրքը, երեխային ճիշտ գրկում պահելը և տեխնիկայի այլ նրբություններ:

Սեմինարների ընթացքում մենք վերլուծել ենք իրական դեպքերը` պրակտիկայից, որտեղ, չնայած իրենց գործողությունների ճշտության մեջ կանանց վստահությանը, գործնականում հաճախ բացահայտվում էր, որ նրանք չունեն անհրաժեշտ հմտություններ, ինչը կարող է հանգեցնել կրծքի ճաքերի, վնասվածքների և այլ խնդիրների, ինչպիսիք են` կաթի կանգը և մաստիտների առաջացումը:

Այս սեմինարների նպատակն էր բարձրացնել բուժաշխատողների իրազեկվածությունը, օգնել բացահայտելու և վերացնելու ոչ պատշաճ կերակրման խնդիրները և կանխելու դրանց վնասակար հետևանքները: