Նեյրոսոնոգրաֆիան (ՆՍԳ) գլխուղեղի ուլտրաձայնային հետազոտություն է: Ժամանակակից մանկաբուժությունը և հատկապես` նեոնատոլոգիան, գրեթե անհնարին է պատկերացնել առանց նեյրոսոնոգրաֆիկ հետազոտության:

նեյրոսոնոգրաֆիա կատարելու ցուցումները.

•  գլխի տրավմաներ,
• բնածին արատներ,
• ներարգանդային վարակներ,
• ներարգանդային կամ հետծննդաբերական թթվածնային քաղց (ասֆիքսիա)
• անհասություն,
•  նեոնատոլոգի, մանկաբույժի, նյարդաբանի ցուցում,
• գենետիկ հիվանդություն,
• կանխարգելիչ հետազոտություն:

Ի՞նչ հիվանդություններ են ախտորոշվում ՆՍԳ օգնությամբ:

• Հիդրոցեֆալիա կամ փորոքային համակարգի լայնացումներ (պոստհեմոռագիկ, վարակային բնույթի),
• ներգանգային արյունազեղումներ,
• գլխուղեղի հիպոքսիկ, իշեմիկ ախտահարումներ,
• գլխուղեղի զարգացման անոմալիաներ,
• ուռուցքներ, կիստաներ,
• վարակիչ հիվանդություններ (մենինգիտ, ներարգանդային CMV- ցիտոմեգալովիրուս),
• Sagittal sinus-ի թրոմբոզ,
• գլխուղեղի անոթների ախտաբանություն:

Ո՞ւմ է անհրաժեշտ իրականացնել գլխուղեղի ուլտրաձայնային հետազոտություն:

Նեյրոսոնոգրաֆիկ հետազոտությունը պարտադիր է վերակենդանացման և ինտենսիվ բուժման կարիք ունեցող բոլոր նորածինների համար: Հետազոտվում են և՛ հասուն, և՛ անհաս նորածինները՝ սկսած կյանքի առաջին ժամերից: Դրանք ծննդաբերական վնասվածքով կամ տրավմատիկ մանկաբարձական միջոցառումների արդյունքում ծնված երեխաներն են, խոշոր քաշով կամ, ընդհակառակը, ծնվելիս փոքր քաշով, ներարգանդային աճի և զարգացման դանդաղում ունեցող, ինչպես նաև նյարդաբանական ախտանիշներով երեխաները: Բացի դրանից, այս հետազոտությունը նշանակվում է ոչ սովորական դեմքի կառուցվածք, գլխի ձև ունեցող, արատներով կամ այլ օրգանների զարգացման շեղումների առկայության դեպքում:

Ե՞րբ է անհրաժեշտ կատարել հետազոտությունը:

ՆՍԳ կարելի է իրականացնել ծնվելուց անմիջապես հետո, կյանքի առաջին ժամերից սկսած և պարբերաբար կրկնել` ըստ անհրաժեշտության, մինչև ավագ հասակը: Եթե այս հետազոտությունը չի իրականացվել ծննդատանը, ապա այն կատարելու բարենպաստ ժամանակահատվածը կյանքի առաջին ամիսներն են: Միակ նախապայմանը գաղթունների բաց լինելն է: Մինչև ≤ 32 շաբաթական ծնված անհասների և բոլոր հասուն, սակայն հիվանդ նորածինների հետազոտումը ցանկալի է իրականացնել ծնվելուց հետո` հնարավորին վաղ: Այնուհետև կրկնակի հետազոտություններն իրականացվում են ըստ ընդունված ուղեցույցների, դուրսգրումից առաջ և 40 շաբաթ. պոստկոնցեպտուալ տարիքում:

Ի՞նչ է ցույց տալիս նեյրոսոնոգրաֆիան:

Ուլտրաձայնային հետազոտությունն իրականացնում են՝ բացառելու գլխուղեղի ախտաբանությունն ինչպես հիվանդ երեխաների, այնպես էլ կլինիկորեն առողջ երեխաների մոտ: Դրանք հիմնականում փորոքային և ուղեղի հյուսվածքի արյունազեղումներն են, հիդրոցեֆալիան, գլխուղեղի վարակային և հիպօքսիկ ախտահարումները, պերիվենտրիկուկյար լեյկոմալյացիան, գլխուղեղի զարգացման արատները և այլն: Ինչպես ցանկացած ուլտրաձայնային հետազոտում, նեյրոսոնոգրաֆիան թույլ է տալիս ախտորոշել օրգանում, տվյալ դեպքում՝ գլխուղեղում, տեղի ունեցող փոփոխությունները և ախտահարումները:

Ինչպե՞ս է իրականացվում հետազոտությունը:

Երեխային հետազոտության համար հատուկ նախապատրաստելու կարիք չկա: Հետազոտության ընթացքում երեխան պառկում է մեջքի վրա կամ գտնվում է մոր ձեռքերին: Հետազոտության առավելություններից է հարմահճակալային պայմաններում իրականացնելու հնարավորությունը, օրինակ` ինտենսիվ թերապիայի բաժանմունքներում:

Չկան այնպիսի վտանգներ կամ հակացուցումներ, որոնք կարող են կապված լինել ուլտրաձայնային հետազոտման հետ: Հետազոտության ընթացքում երեխան անհանգստություն կամ ցավ չի զգում, այն անվտանգ է և չունի հակացուցումներ:

Ուլտրաձայնային հետազոտությունը, սովորաբար, տևում է 10-15 րոպե: Երբ հարկ է լինում գլխուղեղի տարբեր կառույցների չափումներ կատարել կամ դոպլերոգրաֆիկ հետազոտություն իրականացնել, տևողությունը կարող է երկարաձգվել: