Ամառային շոգ եղանակը կարող է իրական փորձություն դառնալ հղիների համար։ Հղիության ընթացքում օրգանիզմն արդեն աշխատում է ուժեղացված ռեժիմով, ենթարկվում է լրացուցիչ ծանրաբեռնվածության, ինչը կարող է առաջացնել... ախտանիշներ՝ այտուցներ, արգանդի հիպերտոնուս և գերտաքացում։

«Հղիության ընթացքում կնոջ օրգանիզմում ավելանում է շրջանառվող արյան ծավալը, ինչի պատճառով նրանք ավելի զգայուն են գերտաքացման նկատմամբ։ Շոգ եղանակը խորացնում է այս վիճակը՝ հանգեցնելով անոթների լայնացման, և, արդյունքում, այտուցների առաջացման։ Բացի այդ, բարձր ջերմաստիճանը կարող է առաջացնել արգանդի հիպերտոնուս, ինչը մեծացնում է վաղաժամ ծննդաբերության ռիսկը։ Ջրազրկումը, որը նույնպես հաճախ է հանդիպում շոգ եղանակին, կարող է խորացնել վերոնշյալ բոլոր խնդիրները:

Ի՞նչ անել

 Առաջինը՝ կարևոր է պահպանել հեղուկի ընդունման ռեժիմը։ Խմել շատ ջուր՝ օրական, առնվազն, 2–2.5 լիտր։ Նախապատվություն տալ մաքուր ջրին, չքաղցրացված թեյերին, չորամրգով կոմպոտներին։ Խուսափել քաղցր գազավորված ըմպելիքից։ Խմել հաճախ և փոքր կումերով՝ մի չսպասել ծարավ զգալուն։ Միշտ վերցրեքլ ջրի շիշ՝ ցանկացած պահի ծարավը հագեցնելու համար:

Շոգ ժամանակ պետք է ճիշտ հագնվել։ Խորհուրդ է տրվում կրել բաց գույնի, ազատ կտրվածք ունեցող, բնական նյութերից (բամբակ, վուշ) պատրաստված հագուստ, որը թույլ կտա մաշկին շնչել և կկանխի գերտաքացումը։ Անհրաժեշտ է նաև գլխարկ կրել (գլխաշոր կամ լայնեզր գլխարկ)` արևի ուղիղ ճառագայթներից պաշտպանվելու համար։ Բժիշկն առաջարկում է հնարավորին շատ ժամանակ անցկացնել զով միջավայրում. եթե տանը օդորակիչ չկա, կարելի է գնալ առևտրի կենտրոններ, գրադարաններ կամ այլ հով տարածք։ Հարկ է խուսափել արևի տակ երկար մնալուց՝ հատկապես ժամը 11:00-ից մինչև 16:00-ը։ Օրվա ընթացքում կարելի է մի քանի անգամ ցնցուղ ընդունել։

Կարևոր է վերահսկել այտուցները։ Դրա համար անհրաժեշտ է, օրինակ, սահմանափակել աղի օգտագործումը, քանի որ այն ջուրը պահում է օրգանիզմում՝ խորացնելով այտուցները։

Հանգստանալու ժամանակ ոտքերը բարձր դիրքում պահել՝ դա կօգնի բարելավել արյան և ավշի շրջանառությունը։ Չմոռանալ ֆիզիկական ակտիվության մասին՝ չափավոր ծանրաբեռնվածությունը, օրինակ՝ քայլելը, կբարելավի շրջանառությունը և կնվազեցնի այտուցները։ Խորհրդակցել բժշկի հետ՝ անհրաժե՞շտ է, արդյոք, միզամուղ դեղերի ընդունում։ Հղիության ժամանակ ինքնաբուժումն անթույլատրելի է:

Անհրաժեշտ է պարբերաբար վերահսկել արյան ճնշումը՝ նորմայից շեղումները ժամանակին հայտնաբերելու համար։ Բացի այդ, պետք է հետևել պտղի շարժումներին․ շարժումների նվազումը կարող է լինել ջրազրկման կամ այլ խնդիրների նշան։