Արգանդի վզիկի էկտոպիան (կամ էկտրոպիոնը) վիճակ է, երբ արգանդի վզիկը ծածկող երկու տեսակի էպիթելի սահմանը տեղափոխվում է նրա արտաքին հեշտոցային մակերեսի վրա...: Սա բավականին տարածված երևույթ է վերարտադրողական տարիքի կանանց մոտ և, երբեմն, կարող է հայտնաբերվել նաև աղջիկների մոտ, այսինքն` լինել բնածին: Շատ դեպքերում այն ​​չի ուղեկցվում որևէ ախտանիշով և կարող է լինել ֆիզիոլոգիական։ 

Պատճառները և ռիսկի գործոնները.

• Հորմոնալ խանգարումներ,
• սեռական օրգանների բորբոքային գործընթացներ (օրինակ. արգանդի վզիկի բորբոքում՝ցերվիցիտ),
• արգանդի վզիկի մեխանիկական վնասվածք, ներառյալ` ծննդաբերության կամ բժշկական միջամտությունների հետևանքով առաջացած վնասվածքներ,
• սեռավարակներ:

Կլինիկական դրսևորումներ.

Չնայած արգանդի վզիկի էկտոպիա ունեցող կանայք, մեծավ մասամբ, չեն ունենում որևէ ակնհայտ գանգատ, նրանք կարող են զգալ.

• ոչ նորմալ հեշտոցային արտադրություն,
• թեթև արյունային արտադրություն` սեռական հարաբերությունից հետո կամ դաշտանների միջև ընկած ժամանակահատվածում,
• ցավ` կոնքի շրջանում:

 Ախտորոշում և բուժում.

 Արգանդի վզիկի էկտոպիան ախտորոշելու համար իրականցվում է.

• միզասեռական օրգանների արտադրության միկրոսկոպիկ հետազոտություն,
• քսուքների բջջաբանական հետազոտություն,
• կոլպոսկոպիա,
• ՊՇՌ մեթոդով մարդու պապիլոմավիրուսի առկայության որոշում:

Շատ դեպքերում էկտոպիան հատուկ բուժում չի պահանջում, սակայն, եթե համապատսխան հետազոտությունները կատարելուց հետո  հայտնաբերվում են ախտաբանական փոփոխություններ, բժիշկի ցուցմամբ նշանակվում է ոչ վիրաբուժական կամ վիրաբուժական բուժում: