1. Ինչպե՞ս կերակրել, որ ցավ կամ վնասվածք չլինի:

Ցավը նշան է, որ կրծքին ամրացումը ճիշտ չէ։ Երեխայի բերանը պետք է ընդգրկի ոչ միայն պտուկը, այլեւ պտուկի շուրջ գտնվող մուգ շրջանագիծը... (արեոլա)։ Ճիշտ դիրքը՝ որովայն-որովայն շփմամբ, գլուխն ու մարմինը նույն հարթությամբ, մոտեցնելիս՝ քիթիկը լինի պտուկի մակարդակին, արեոլան դնչիկի մոտ ավելի քիչ երեւա, քան քիթիկի մոտ։ Այս ամենը թույլ է տալիս խորը եւ ճիշտ ամրացում կրծքին եւ կանխում է ցավը։

2. Կարելի՞ է կերակրել կրկնապտուկով:

Այո, եթե կան ցուցումներ՝ օրինակ ներընկած պտուկ։ Կարեւորը՝ ճիշտ մոտեցնել կրծքին, ընթացքում փորձել հանել կրկնանտուկը, ինչպես նաեւ ընտրել ճիշտ չափի կրկնապտուկ, եթե անհրաժեշտ է, կարելի է օգտվել պտուկի ձեւավորման մեթոդներից (օր.՝ նախնական կարճ կթում, պոմպով կամ ձեռքով կամ հետադարձ սեղմում)։

3. Կարելի՞ է կթել կուրծքը:

Այո, երբ անհրաժեշտ է (օր.՝ ցավի մեղմման, կաթի պահպանման կամ կաթի քանակը ավելացնելու համար)։ Կարեւոր է չչարաշահել, որպեսզի կաթի քանակի գերառաջարկ չլինի եւ չառաջանան հաճախակի լակտոստազներ։

4. Ի՞նչ ուտել, որ կաթը շատանա:

Կաթի քանակը որոշվում է ոչ թե սննդով, այլ կերակրումների հաճախականությամբ եւ կրծքի արդյունավետ դատարկմամբ։ Լավ սնունդը օգնում է մայրիկի առողջությանը, բայց հիմնական «խթանը»՝ հաճախակի եւ ճիշտ կերակրումն է։

5. Կարելի՞ է կերակրել, երբ ջերմություն ունեմ:

Այո։ Շատ դեպքերում (վիրուսային, մրսածություն, նույնիսկ բակտերիալ վարակ) կերակրումը շարունակվում է։ Մայրիկի կաթում արդեն կան հակամարմիններ, որոնք պաշտպանում են երեխային։

6. Կարելի՞ է կերակրել, երբ ատամներն եմ բուժում:

Այո։ Շատ դեղեր եւ անզգայացնող նյութեր համատեղելի են կրծքով կերակրման հետ։ Կարելի է ստուգել www.e-lactancia.org կայքում կամ խորհրդակցել մասնագետի հետ։

7. Կարելի՞ է կրծքով կերակրել ռենտգենից կամ համակարգչային տոմոգրաֆիայից հետո:

Այո։ Ռենտգենը եւ ԿՏ-ն չեն ազդում կաթի վրա։ Եթե կիրառվել է կոնտրաստային նյութ, ապա կախված տեսակից՝ կարելի է անմիջապես կամ 12–24 ժամ անց շարունակել (ստուգել ըստ կոնտրաստի անունի)։