Էպիդուրալ անզգայացումը ծննդաբերության ընթացքում կիրառվող ցավազրկման ամենատարածված տեսակն է...:

Ինչպե՞ս և ե՞րբ է իրականցվում էպիդուրալ անզգայացում:

Էպիդուրալ անզգայացման համար, անեսթեզիոլոգը մեջքի ստորին հատվածում տեղադրում է ասեղ և փոքրիկ խողովակ՝ կաթետր: Ասեղը հանվում է, իսկ կաթետրը թողնվում է տեղում՝ անհրաժեշտության դեպքում դեղորայքն ավելացնելու նպատակով: Էպիդուրալ անզգայացումը կարելի է սկսել ծննդաբերության ցանկացած փուլում՝ սկզբում, ընթացքում կամ նույնիսկ վերջում՝ խորհրդակցելով Ձեր բժշկի հետ:

Ցավոտ է արդյո՞ք էպիդուրալ անզգայացման իրականցումը:

Անեսթեզիոլոգը նախապես անզգայացնում է մեջքի այն հատվածը, որտեղ տեղադրվելու է ասեղը,ապա կաթետրը, ինչը կարող է 1-2 վայրկյան խայթոցի կամ այրոցի զգացում առաջացնել: Հենց այդ անզգայացման հետևանքով ցավը, որպես կանոն, լինում է չնչին: Երբեմն, բուժառուները՝ հղիները կարող են զգալ որոշակի ճնշում՝ ասեղը տեղադրելիս:

Ի՞նչ է ապահովում էպիդուրալ անզգայացումը:

Էպիդուրալ անզգայացումն ապահովում է ցավազրկում՝ գոտի ստեղծելով պորտից մինչև ստորի վերջույթների վերին հատվածը: Այն թույլ է տալիս ծննդաբերության ընթացքում լինել արթուն և զգոն, ինչպես նաև զգալ ճնշման զգացողություն: Այս ունակությունը Ձեզ հնարավորություն է տալիս ծննդաբերության երկրորդ շրջանում ճիգեր գործադրել և դուրս մղել երեխային: Ցավազրկող դեղամիջոցի ազդեցության համար կարող է պահանջվել շուրջ 15 րոպե:

Որքա՞ն ժամանակ է պահպանվում ցավազրկումը էպիդուրալ անզգայացման դեպքում:

Ցավազրկումն էպիդուրալ անզգայացման միջոցով կարելի է շարունակել այնքան ժամանակ, որքան առկա է դրա կարիքը: Դեղերի քանակը, որը Դուք ստանում եք էպիդուրալ անզգայացման միջոցով, կարելի է ավելացնել կամ պակասեցնել ըստ անհրաժեշտության:

Կարո՞ղ է արդյոք էպիդուրալ անզգայացումը դանդաղեցնել ծննդաբերության ընթացքը կամ հանգեցնել կեսարյան հատման:

 Այս մասին բավարար հիմնավորված ապացույցները բացակայում են: Կեսարյան հատումը, սովորաբար կատարվում է հատուկ ցուցումներով , ծննդաբերության ընթացքը երբեմն դանդաղում է այլ պատճառների հետևանքով: Էպիդուրալ անզգայացման ժամանակ Դուք կարող եք զգալ կծկանքներ, պարզապես դրանք ցավոտ չեն լինի և Դուք կկարողանաք արդյունավետ կերպով ճիգեր գործադրել և դուրս մղել երեխային: Որոշ ապացույցներ կան, որ էպիդուրալ անզգայացման կիրառումը կարող է արագացնել ծննդաբերության առաջին շրջանը՝ թույլ տալով մորը հանգստանալ:

Կարո՞ղ է էպիդուրալ անզգայացումը վնասել երեխային:

 Դեղերի քանակը, որը հասնում է երեխային էպիդուրալ անզգայացման ժամանակ, չնչին է և բացակայում են ապացույցներ դրա երեխայի վրա վնասակար ազդեցության վերաբերյալ:

Արդյո՞ք էպիդուրալ անզգայացումը ունի կողմնակի ազդեցություններ:

 Էպիդուրալ անզգայացումն անվտանգ է, իսկ լուրջ բարդությունները չափազանց հազվադեպ են: Այնուամենայնիվ, ինչպես բոլոր դեղամիջոցների և բժշկական միջամտությունների դեպքում, այս պարագայում ևս կան որոշակի պոտենցիալ կողմնակի ազդեցություններ՝ զարկերակային ճնշման անկում, մեջքի ցավեր և գլխացավեր, որոնք հնարավոր է հսկել:

Արդյո՞ք էպիդուրալ անզգայացումը բերում է մեջքի ցավերի:

 Երբեմն հնարավոր են ցավեր մեջքի ստորին հատվածում՝ ասեղի մուտքի շրջանում: Այս ցավը պետք է տևի ոչ ավելի, քան մի քանի օր: Ոչ մի ապացույց չկա, որ էպիդուրալ անզգայացումը կարող է մեջքի մշտական ցավի պատճառ դառնալ:

Արդյո՞ք էպիդուրալ անզգայացումը բերում է գլխացավերի:

Հազվագյուտ դեպքերում էպիդուրալ անզգայացման ժամանակ ասեղը ծակում է ողնուղեղը պատող թաղանթը, ինչը կարող է նպաստել գլխացավերի առաջացման: Բուժման բացակայության պարագայում կարող են տևել մի քանի օր: Եթե նման իրավիճակ ստեղծվի, անհրաժեշտ է քննարկել բուժման տարբերակներ անեսթեզիոլոգի հետ:

Ի՞նչ է համակցված ողնուղեղային-էպիդուրալ անզգայացումը:

Ծննդաբերության ժամանակ ողնուղեղային անզգայացումն երբեմն կիրառվում է էպիդուրալի հետ համատեղ՝ ծննդաբերական ցավի անհապաղ վերացման նպատակով: Ողնուղեղային անզգայացումն, ինչպես և էպիդուրալը, իրականացվում է մեջքի ստորին հատվածում ներարկման միջոցով : մինչ Դուք նստած կամ պառկած եք կողքի վրա անկողնում, փոքր քանակությամբ դեղամիջոց ներարկվում է ողնուղեղային հեղուկի մեջ՝ մարմնի ստորին կեսի թմրածությունն ապահովելու նպատակով: Այն լավ թեթևացնում է ցավը և սկսում է արագ գործել, բայց տևում է ընդամենը մեկ կամ երկու ժամ և սովորաբար ծննդաբերության ընթացքում արվում է միայն մեկ անգամ: Էպիդուրալ անզգայացումն ապահովում է շարունակական ցավազրկում ողնուղեղային անզգայացման ավարտից հետո: