Հղիությունը հրաշալի ճանապարհ է, որը բաժանվում է երեք փուլերի՝ յուրաքանչյուրն իր առանձնահատկություններով և զգացողություններով...։ Խորհուրդ է տրվում վարել առողջ ապրելակերպ, զերծ մնալ վնասակար սովորություններից (ծխախոտ, ալկոհոլային խմիչքներ), օգտագործել դյուրամարս, թեթև սնունդ, բացառել հում մսամթերքի, ծովամթերքի օգտագործումը: Ցանկացած դեղամիջոց ընդունելուց առաջ պարտադիր խորհրդակցել բժշկի հետ։ Յուրաքանչյուր եռամսյակ պահանջում է հատուկ ուշադրություն:

Առաջին եռամսյակ (1–13 շաբաթ) ՝ ձևավորմանև զգուշության փուլ:

Այս շրջանում ձևավորվում են պտղի հիմնական օրգան-համակարգերը: Շատ կարևոր է այս ընթացում ընդունել ֆոլաթթու՝ պտղի նյարդային համակարգի բնածին արատների կանխարգելման նպատակով: Հաճախ դիտվում է տոքսիկոզ (սրտխառնոց,փսխում), հոգնածություն և տրամադրության փոփոխություններ։ Հղիության 8-12 շաբաթական ժամկետում անհրաժեշտ է հաշվառվել:   

Երկրորդ եռամսյակ (14-27 շաբաթ)՝  կայունության և ակտիվության փուլ:

Այս շրջանում մայրիկն ավելի հանգիստ է զգում իրեն, էներգիան վերականգնվում է։ Սա լավագույն ժամանակն է թեթև ֆիզիկական ակտիվության՝ լողի, յոգայի կամ հղիների մարմնամարզության համար։ Այս փուլը համարվում է նաև ամենաանվտանգը ճամփորդությունների համար։ Անհրաժեշտ է ամիսը մեկ անգամ պարբերականությամբ հաճախել բժիշկի:

Երրորդ եռամսյակ (28–40 շաբաթ)՝պատրաստության և հանգստի փուլ:

Փոքրիկի զարգացումը գրեթե ավարտված է, իսկ մայրիկը պատրաստվում է ծննդաբերությանը։ Կարևոր է խուսափել ծանրաբեռնվածությունից, եթե առկա են այտուցներ, հևոց կամ զարկերակային ճնշման բարձրացում անհրաժեշտ է դիմել բժշկի՝ հղիության վերջին փուլի առողջ ընթացքը ապահովելու համար։ Այս փուլում անհրաժեշտ է այցելել բժիշկի 2-3 շաբաթը մեկ հաճախականությամբ: