Սթրեսը մայրության ընթացքում սովորական երևույթ է և կարող է որոշակիորեն ազդել կրծքով կերակրման վրա։ Սակայն պետք չէ կարծել, թե սթրեսը դարձնում է կրծքով կերակրումն անհնարին...։ Օրգանիզմը կարող է հարմարվել, իսկ ճիշտ աջակցությունն օգնում է պահպանել լակտացիան։

Կարճաժամկետ սթրես

Հանկարծակի սթրեսի դեպքում օրգանիզմում բարձրանում է ադրենալինի մակարդակը, որը կարող է ժամանակավորապես դանդաղեցնել կաթի հոսքը։ Սա չի նշանակում, որ կաթը բացակայում է․ պարզապես օքսիտոցինի աշխատանքը դանդաղում է։ Սթրեսի նվազումից հետո կաթը կրկին սկսում է հոսել։

Երկարատև կամ քրոնիկ սթրես

Երկար շարունակվող լարվածությունը կարող է ազդել մոր ընդհանուր ինքնազգացողության, սննդակարգի և էներգետիկ պաշարի վրա։ Վիտամինների ու հանքանյութերի պակասը, ինչպես նաև անբավարար սնունդը կարող են աստիճանաբար նվազեցնել լակտացիան։ Այս դեպքում մասնագիտական աջակցությունը կարևոր է՝ գործընթացը վերահսկելու և վերականգնելու համար։

Ի՞նչը կարող է օգնել պահպանել լակտացիան

• երեխային հաճախ կրծքին մոտեցնել
• պահպանել հավասարակշռված սննդակարգ
• հնարավորինս ապահովել հանգիստ
• ստանալ ընտանիքի աջակցություն

Կրծքով կերակրումը և սթրեսը իրար չեն հակասում։ Բնությունն այնպես է ձևավորել մայրական օրգանիզմը, որ նույնիսկ բարդ պայմաններում այն պահպանել է իր հիմնական գործառույթները։ Եթե լակտացիան նվազել կամ դադարել է, դա դեռ չի նշանակում, որ հնարավոր չէ վերականգնել այն՝ ճիշտ օգնության և խորհրդատվության միջոցով։

Մարգարյան ծննդատանը կրծքով կերակրման մասնագետն ամեն օր այցելում է հետծննդյան բաժանմունք և աջակցում մայրիկներին կերակրման ճիշտ պրոցեսի և հնարավոր դժվարությունների հաղթահարման հարցերում։

Այս շարունակական աջակցությունն ապահովում է հանգիստ և վստահ սկիզբ ինչպես մայրիկի, այնպես էլ նորածնի համար։