Մայրությունը բնական, բայց միաժամանակ զգալի փոփոխություններով լի փուլ է՝ ուղեկցվող ինչպես ուրախությամբ, այնպես էլ պատասխանատվությամբ, հուզական լարումով և երբեմն...՝ մտահոգություններով։ Հոգեբանական առողջության պահպանումը շատ կարևոր է, քանի որ մայրիկի հոգեվիճակն անմիջական ազդեցություն ունի երեխայի վրա։

Հղիության և ծննդաբերության հետ կապված հորմոնալ, կենսաբանական և կենսակերպային փոփոխությունները կարող են առաջացնել․

• բարձր զգայունություն և հուզական տատանումներ,
• անհանգստություն կամ ինքնավստահության անկում,
• հոգնածության արագ կուտակում,
• երբեմն՝ մեկուսացվածության զգացում:

Սա բնական է, և այս փոփոխությունները հաճախ ժամանակավոր բնույթ ունեն։

Խորհուրդ է տրվում դիմել մասնագետի, եթե դիտվում են․

• երկարատև տխրություն կամ հետաքրքրության կորուստ,
• քնի լուրջ խանգարումներ,
• անսովոր վարքային փոփոխություններ,
• մտքեր, որոնք անհանգստացնում կամ դժվար կառավարելի են:

Այս նշանները կարող են լինել հետծննդյան դեպրեսիայի արտահայտություններ, որոնք պահանջում են մասնագիտական աջակցություն։

Ի՞նչ կարող է օգնել մայրիկին

• Լիարժեք հանգիստ և ճիշտ կազմակերպված օրակարգ։ Նույնիսկ կարճատև հանգիստը կարևոր է հոգնածության ու լարվածության նվազեցման համար։
• Ընտանիքի աջակցությունը մեծ դեր ունի մայրիկի հուզական կայունության համար։
• Ֆիզիկական ակտիվությունն ու զբոսանքը բարելավում են ինքնազգացողությունն ու հավասարակշռությունը։
• Ժամանակին ստացված մասնագիտական աջակցությունը կարող է կանխել հոգեբանական խորը բարդությունները:

Մայրությունը չի պահանջում «կատարյալ» լինել, իսկ հոգեբանական առողջության մասին հոգալը ոչ միայն մայրիկի, այլև երեխայի համար է կարևոր։