Որքանո՞վ է կորոնավիրուսը վտանգավոր հղիների համար:

Հղիության ընթացքում կորոնավիրուսի ազդեցության վերաբերյալ տվյալները դեռևս քիչ են, բայց պարզ է, որ հղի կանայք ավելի մեծ վտանգի են ենթարկվում այդ վարակի հետևանքով, քանի որ նրանց օրգանիզմում և իմունային համակարգում առկա են հորմոնալ մեծ տեղաշարժեր, որոնք նրանց խոցելի են դարձնում շնչառական վարակների նկատմամբ: Խոցելի է նաև դեռևս նոր զարգացող պտուղը:

Այդ պատճառով անհրաժեշտ է նախազգուշական և կանխարգելիչ միջոցներ ձեռնարկել, իսկ որոշ ախտանշանների դեպքում՝ բարձր ջերմություն, հարբուխ, հազ, անհապաղ դիմել բժշկի:

Հղիության ժամանակ կորոնավիրուսն ինչպե՞ս է արտահայտվում:

Եթե կա կորոնավիրուսային վարակի կասկած, հղիները պետք է առաջնահերթ կերպով հետազոտվեն: Նրանց մոտ հիվանդության ծանր ընթացքի և հիվանդանոցում բուժվելու հավանականությունն ավելի մեծ է: Հիվանդության հետևանքով կարող է նաև ծննդաբերությունը վաղաժամ սկսել:

Կարո՞ղ է կորոնավիրուսով հիվանդ մայրը կրծքով կերակրել երեխային:

Կովիդով հիվանդ կանայք կարող են կրծքով կերակրել երեխային, սակայն անհրաժեշտ է որոշ նախազգուշական միջոցներ ձեռնարկել՝ անպայման կրել դիմակ, վնասազերծել ձեռքերը երեխայի հետ շփվելուց առաջ, հնարավորին ախտահանել շրջակա մակերևույթները:

Ե՞րբ է նպատակահարմար պատվաստվելը:

Կարելի է պատվաստվել և՛ հղիություն պլանավորելուց առաջ, և՛ դրանից հետո: Պատվաստումը ցուցված է հղիության ցանկացած փուլում:  Քանի որ կովիդ վարակի ազդեցությունը և հետևանքները հղի կնոջ և պտղի համար շատ ավելի վտանգավոր են, քան ավելի պակաս վտանգավոր պատվաստումը:

Մինչ այժմ կատարված մոր և պտղի հետազոտությունները կողմնակի հատուկ բարդություններ չեն հայտնաբերել:

Ի՞նչ ախտանշաններ կարող են դիտվել պատվաստումից հետո:

Պատվաստվելուց հետո, ինչպես բոլոր պատվաստվածների մոտ, հղիների մոտ ևս կարող են դիտվել ջերմություն, գլխացավ, մկանային և հոդային ցավեր, դող:

Նման դեպքում պետք է ընդունել պարացետամոլ, որն անվտանգ է և ցուցված է հղիության ժամանակ:

Ըստ որոշ տվյալների, մոր պատվաստվելու դեպքում, կովիդի դեմ հակամարմինները կարող են նաև թափանցել պտղի օրգանիզմ և մի քանի ամիս նրան որոշակի պաշտպանություն  ապահովել: