Դեկտեմբերի 14-ին Մոր և մանկան առողջության պահպանման գիտահետազոտական կենտրոնի տնօրեն Դավիթ Մելիք-Նուբարյանն անձնակազմին է ներկայացրել կլինիկայի  նոր ղեկավարին՝ բ․գ․դ․, պրոֆեսոր Արմեն Բլբուլյանին։

Իր խոսքում Արմեն Բլբուլյանն ասաց, որ Մոր և մանկան առողջության պահպանման գիտահետազոտական կենտրոնն (ՄՄԱՊԳՀԿ) իր համար շատ հոգեհարազատ վայր է, որտեղ նա անցել է կլինիկական օրդինատուրա։

«Շատ ոգևորիչ էր, երբ ստացա այստեղ աշխատելու հրավեր և մեծ ուրախությամբ ընդունեցի այն։

ՄՄԱՊԳՀԿ եզակի բուժհաստատություններից է, որն ունի հարուստ ավանդույթներ, և այստեղ աշխատելը շատերի համար մեծ երազանք է ու պատիվ»։

Խոսելով առաջիկա ծրագրերից՝ պրոֆեսոր Բլբուլյանը հեռանկարային համարեց  բժշկագիտության զարգացումը․ «Մեծ հույսեր ունեմ համագործակցելու ակադեմիական ինստիտուտների հետ՝ ֆիզիոլոգիայի, մոլեկուլյար կենսաբանության, բիոքիմիայի, ինչպես նաև ֆիզիկայի ինստիտուտի և, անշուշտ, ԵՊԲՀ-ի հետ։

Շատ կարևոր է, որ այստեղ փորձի փոխանակություն լինի պաթոֆիզիոլոգների, ռևամատոլոգների, էնդոկրինոլոգների, սիրտ-անոթային համակարգի մասնագետների հետ։
Պետք է  շարունակել ավանդույթները և ներդնել բուժման նոր մեթոդները առօրյա գործունեության մեջ, կանոնավոր իրականացնել բուժանձնակազմի վերապատրաստումներ։ Անելիքները շատ են և բավականին հետաքրքիր»։