Օրերս Մոր և մանկան առողջության պահպանման գիտահետազոտական կենտրոնում մեկնարկել է վերապատրաստման ծրագիր՝ միջին բուժաշխատողների համար։

ՄՄԱՊԳՀԿ գլխավոր տնօրեն Դավիթ Մելիք-Նուբարյանը վստահ է, որ այն կենտրոնում իրագործվող կարևոր բարեփոխումներից մեկն է և դրական անդրադարձ  կունենա մատուցվող ծառայությունների որակի վրա։   

«Կենտրոնի ընդհանուր զարգացման համատեքստում մեծ կարևորություն ենք տալիս մարդկային ներուժին, քանի որ մեր ամենամեծ հարստությունը մեզ մոտ աշխատող մարդիկ են, ուստի գիտելիքների և հմտությունների շարունակական զարգացմանն ուղղված ներդրումը լիովին տեղին է։ Ի վերջո, այս ամենն անդրադառնում է պացիենտներին, ծննդկաններին, հղիներին մատուցվող բժշկական օգնության և սպասարկման որակի վրա, իսկ որակը բուժօգնության կարևոր  առաջնահերթություններից է»։

«Management Mix» խորհրդատվական և ուսումնական ընկերության նախագահ Րաֆֆի Սեմերջյանի խոսքով՝ Մոր և մանկան առողջության պահպանման գիտահետազոտական կենտրոնը ճիշտ ուղու վրա է, քանի որ ներդնում է կառավարման ժամանակակից համակարգ, որի նպատակը պացիենտ-բուժքույր փոխհարաբերությունները բարելավելն է,  պացիենտների և նրանց հարազատների հետ առավել հմտորեն և արդյունավետ հաղորդակցվելը։

«Այն, անշուշտ, երկարատև գործընթաց է, և քայլ առ քայլ պետք է հասնել նպատակին։ Մեր առաջարկած ծրագիրը համապատասխանում է բոլոր միջազգային չափորոշիչներին։ Այն իրականացվում է թվային խաղերի, թեստերի և ինտերակտիվ շփման միջոցով։ Այստեղ մեծ կարևորություն ենք տալիս նաև խմբային աշխատանքին»։