Հղիության սովորութային կրելախախտը վիճակ է, երբ կնոջ մոտ արձանագրվում են հղիության կրկնվող ինքնաբերական ընդհատումներ: Սովորաբար այս տերմինը կիրառվում է, երբ լինում է 2 կամ ավելի հաջորդական... ինքնաբերական վիժում մինչև հղիության 22 շաբաթականը:

Պատճառները

Ախտաբանության հիմքում մի շարք բացասական գործոններ են։

• Ապագա մանկիկի ծնողների տարիքն ազդում է ինչպես առողջության, այնպես էլ ձվաբջիջների և սպերմատոզոիդների վրա, որոնցից էլ կախված է հղիության ընթացքն ու զարգացումը։
• Էնդոմետրիումի ախտաբանությունը, որի ռեցեպտիվությունը կամ արգանդում առկա նորագոյացությունը խանգարում են իմպլանտացիային։
• Գենետիկ ախտաբանությունը 80 տոկոս դեպքերում դառնում է հղիության ընթացքի խանգարման պատճառ, ուստի ԱՄԲ-ից առաջ բուժառուներին առաջարկում են PGT-A սաղմեր (Preimplantation genetic testing for aneuploidy։ նախաիմպլանտացիոն գենետիկ թեստավորում անուպլոիդիայի համար) և գենետիկ խորհրդատվություն՝ բնական բեղմնավորման պլանավորման համար։
• Արգանդի կազմության ախտաբանությունը, օրինակ, Աշերմանի համախտանիշի ժամանակ զարգանում են արգանդի պատերի միաձուլում և կպումներ։
• Արյան մակարդելիության համակարգի գործունեության խանգարումը (ժառանգական թրոմբոֆիլիաներ):
• Աուտոիմուն հիվանդությունները (անտիֆոսֆոլիպիդային համախտանիշ):
• Հորմոնալ խանգարումները․ վահանագեղձի գործունեության և հորմոնների մակարդակի խախտումը 8-20 տոկոս դեպքերում անկրելիության պատճառ են։
• Մի քանի քրոնիկ հիվանդություններ, ներառյալ՝ շաքարային դիաբետը։

Ախտորոշումը

Անկրելիության ախտորոշման համար անհրաժեշտ է կոմպլեքս հետազոտություն՝ լաբորատոր, գենետիկ-մոլեկուլյար և գործիքային:

Առաջին հերթին, պեըք է պարզել մինչև այդ եղած վիժումների պատճառը՝ հետագա հղիությունը պլանավորելու համար: Հաշվի են առնվում առկա քրոնիկ հիվանդությունները, հորմոնալ խախտումները, ուռուցքային հիվանդությունները, բացասական գործոնները:

Գինեկոլոգիական հետազոտություն

Հատուկ ուշադրություն է դարձվում փոքր կոնքի օրգանների բորբոքային խնդիրներին, վարակիչ և գինեկոլոգիական հիվանդություններին, դաշտանային ցիկլի խանգարումներին:

Կլինիկական հետազոտություններ

Խորհուրդ են տրվում կատարել վահանագեղձի հետազոտություն, էնդոկրինոլոգի, գենետիկի, հեմատոլոգի խորհրդատվություն՝ արյան համակարգի հիվանդությունների հայտնաբերման և բուժման նպատակով:

Լաբորատոր ախտորոշում

Զույգերից յուրաքանչյուրին նշանակվում են հորմոնների հետազոտություններ, կատարվում է սեռավարակների սքրինինգ, որոշ օրգան-համակարգերի խանգարումների հայտնաբերման նպատակով համապատասխան հետազոտություններ,  նաև կարիոտիպավորում՝ պարզելու զույգի ժառանգական, գենետիկ հիվանդությունների առկայությունը:

Հետազոտությունների արդյունքներով որոշվում է բուժման ռազմավարությունը:

Բուժումն անհատական է՝ կախված ախտաբանության պատճառներից: