Կանանց անմիզապահությունը ախտանշան է, որը հաճախ հանդիպում է քառասունից բարձր տարիքի կանանց մոտ: Այն արտահայտվում է մեզի ոչ կամային հոսքով հանգստի կամ ֆիզիկական աշխատանքի ժամանակ:

Տարբերում են.

• Իմպերատիվ, երբ առկա է միզապարկի ներվավորման խնդիր կամ բորբոքում:
• Սթրեսային
• Խառը
• Էնուրեզ /անմիզապահություն քնի ընթացքում/

Պատճառները

• Տարիքը – տարիների ընթացքում շեքի մկանները թուլանում են
• Քրոնիկ հիվանդություններ /շաքարային դիաբետ, սրտային անբավարարություն/
• Ավելորդ քաշ, ճարպակալում
• Ցիստիտ
• Միզաքարային հիվանդություն, պիելոնեֆրիտ
• Վագինիտ
• Միզապարկի, ուրեթրայի կամ մոտակա հյուսվածքների նորագոյացություններ
• Մշտական հազ /քրոնիկ բրոնխիտ, տուբերկուլոզ, ծխել և այլն/
• Միզասեռական օրգանների վարակիչ հիվանդություններ
• Հետդաշտանադադար
• Հղիություն, ծննդաբերություններ
• Փոքր կոնքի օրգանների վիրահատություններ
• Շեքի օրգանների մկանների թուլություն և ներքին օրգանների արտանկում՝ պրոլապս
• Սթրես, ընկճախտ (դեպրեսիա), նևրոզներ

Բարդությունները
Ժամանակի ընթացքում ախտանշաններն ավելի արտահայտիչ են դառնում: Ծանր դեպքում դիտվում է անկառավարելի վիճակ: Դա ազդում է կնոջ կյանքի որակի վրա:

Կանխարգելումը
Կանխարգելմամբ պետք է ամեն կին զբաղվի վերարտադրողական շրջանում և մինչև դաշտանադադարը: Անհրաժեշտ է մարմնամարզություն, ընդհանուր կոփող միջոցառումներ, ակտիվ կյանք, վազք, կոնքի օրգանների մկանների ամրացում /Կեգելի վարժություններ/:

Ախտորոշման համար անհրաժեշտ է.

• Արյան ընդհանուր հետազոտություն
• Մեզի ընդհանուր հետազոտություն
• Ուրոֆլոումետրիա
• Միզապարկի ՈՒՁՀ
• Փոքր կոնքի օրգանների ՈՒՁՀ
• Ցիստոսկոպիա

Բուժումը
Ծանր դեպքերում կարող է իրականացվել վիրահատական բուժում: Դեղորայքային բուժման ժամանակ նշանակվում են հորմոնալ, սիմպտոմատիկ միջոցներ, հակադեպրեսանտներ:

Երբեմն կարիք է լինում հոգեթերապևտի խորհրդատվության: