Ինչո՞ւ է կարևոր լսողության սքրինինգ ծրագիրը նորածինների մոտ։
Երեխաների որոշ տոկոս ծնվում է լսողության խանգարումով: Յուրաքանչյուր 1000 նորածնից 1-3-ը ծնվում է խուլ: Մեր հանրապետությունում անցկացվող լսողության նորածնային սքրինինգ ծրագիրը կարևոր է հենց այդ երեխաների համար:

Հետազոտությունն օգնում է, որ նրանք ժամանակին ստանան անհրաժեշտ օգնություն և հնարավորություն ունենան նորմալ զարգանալու:
 

Ինչպե՞ս է իրականացվում։
Լսողության սքրինինգը երեխայի համար բացարձակ անվտանգ է, անցավ և կարճատև:

Երեխաներից շատերին անհրաժեշտ է լինում անցնել լսողության երկրորդ թեստը: Դա բոլորովին չի նշանակում, որ երեխան անպայման ունի լսողության խնդիր:

Դրա պատճառ կարող են հանդիսանալ՝

1. Երեխայի անհանգստությունը հետազոտման ժամանակ
2. Արտաքին աղմուկը
3. Հեղուկի առկայությունն ականջներում

Հետազոտությունն անպայման պետք է կատարել 3 շաբաթից, անգամ, երբ նկատվում է որոշակի լսողական արձագանք:

Երեխան կարող է ունենալ կամ չունենալ ծանրալսողություն, սակայն անհրաժեշտ է համոզված լինել դրանում, քանի որ պաթոլոգիայի առկայության դեպքում վաղաժամ միջամտությունը երաշխավորում է վերականգնողական միջամտությունների բարձր արդյունավետությունը:

Հետազոտության մասին իրազեկումը ծնողներին։

Լսողության նորածնային սքրինինգի իրականացման ժամանակ անհրաժեշտ է ծնողներին իրազեկել հետազոտության անհրաժեշտության և կիրառվող մեթոդի մասին: Ծնողներին պետք է տալ սպառիչ պատասխաններ ծագած բոլոր հարցերի վերաբերյալ՝ հետագայում հնարավոր թյուր ըմբռնումները և խնդիրները կանխելու նպատակով:

Պետք է համոզվել, որ ծնողը հասկացել է, որ սքրինինգ թեստն ախտորոշիչ չէ, և եթե երեխան ուղղորդվում է հետագա հետազոտման, դա դեռ չի նշանակում, որ երեխան լավ չի լսում, քանի որ ծնողները սովորաբար մտահոգվում են, երբ երեխան չի անցնում սքրինինգային թեստը: Պետք է զգույշ լինել ծնողներին թեստի արդյունքների իրազեկման ժամանակ: Թեստի արդյունքները գրանցվում են փոխանակման քարտի համապատասխան տողի համապատասխան սյունակում: Եթե երեխան հետազոտվել է, ապա նշվում է այդ մասին: Եթե թեստը չի անցել, ապա գրվում է, որ նորածինը կարիք ունի հետագա հսկողության, որի մասին տեղեկացվում է համապատասխան կենտրոնի մասնագետներին:

Ծնողներին պետք է տեղեկացնել այն կենտրոնի մասին, որտեղ պետք է իրականացվեն հետագա ստուգումները, եթե անհրաժեշտություն կա կրկնակի հետազոտության:

Որտե՞ղ են կատարվում լսողության հետ կապված հետազոտությունները
Մեր հանրապետությունում այդ կենտրոններն են՝ «Արաբկիր» ԲՀ-ԵԴԱԻ-ի Հանրապետական մանկական սուրդոլոգիական կենտրոնը և «Էրեբունի» ԲՀ-ի կոխլեար իմպլանտացիայի և լսողության վերականգնողական քաղաքային կենտրոնը:

Պետք է նշել, որ կան որոշ դեպքեր, երբ անկախ նորածինների լսողության սքրինինգի արդյունքներից, անհրաժեշտ են լսողության պարբերական ստուգումներ, որոնց մասին գրվում է փոխանակման քարտում, և այդ երեխաները գտնվում են տեղամասային մանկաբույժի հսկողության տակ։