Ինչպիսի՞ն պետք է լինի հղի կնոջ հսկողությունը հնարավոր վտանգներից խուսափելու համար։

Հղիությունը կնոջ օրգանիզմում ֆիզիոլոգիական գործընթաց է՝ բեղմնավորումից մինչև երեխայի ծնունդը: Կարևոր և անհրաժեշտ իրադարձություն է հղիի կյանքում առաջին այցը մանկաբարձ-գինեկոլոգին, որի ժամանակ մասնագետի կողմից հաստատվում է հղիության փաստը, որոշվում նրա ժամկետը, գնահատվում է կնոջ ընդհանուր վիճակը, հայտնաբերվում են հնարավոր վտանգները, զուգորդող հիվանդությունները, կազմվում է հետազոտությունների և նշանակումների պլանը:

Բժշկի դիմելու լավագույն շրջանը հղիության առաջին եռամսյակն է (մինչև 12 շաբաթականը):
Հղին պետք է ժամանակին իրականացնի անհրաժեշտ հետազոտությունները և հետևի բժշկի հրահանգներին՝ վտանգներից խուսափելու համար:

Բժշկի ի՞նչ հրահանգների և խորհուրդների պետք է հետևի ապագա մայրը։

Ընդհանուր անհրաժեշտ հրահանգներն են.

• խուսափել երկարատև ֆիզիկական ծանրաբեռնվածությունից և գիշերային աշխատանքից,
• խուսափել ֆիզիկական մարզումներից, սպորտով զբաղվելուց, որոնք կարող են նպաստել որովայնի վնասվածքներին և ընկնելուն,
• խուսափել սթրեսներից,
• հնարավորին խուսափել երկարատև թռիչքներից,
• սննդի մեջ բացառել մեթիլսնդիկային պարունակությամբ ձկնեղենը, չպաստերիզացված կաթը, փափուկ, հասունացող պանիրները, ապխտած մթերքը,
• հրաժարվել ալկոհոլի օգտագործումից, ծխելուց։

Ո՞ր ախտանշաններն են համարվում վտանգավոր պտղի և մոր համար։

Հղիության ընթացքի մեջ ցանկացած շեղման դեպքում անմիջապես պետք է դիմել մանկաբարձ-գինեկոլոգի, քանի որ դա կարող է լուրջ վտանգի ախտանշան լինել:

Վտանգավոր ախտանշաններ են.

• օրվա մեջ 5 և ավելի փսխումը,
• մարմնի քաշի կորուստը 3 կգ-ից ավելի՝ 1-1,5 շաբաթում,
• 130/80-ից բարձր զարկերակային ճնշումը,
• սեռական ուղիներից արյունային կամ առատ ջրային արտադրությունը,
• ուժեղ գլխացավը, տեսողության խանգարումները, աչքերի առաջ շաղվածությունը ,
• ցանկացած բնույթի ցավը՝ որովայնի ստորին հատվածում,
• հղիության երկրորդ կեսում էպիգաստրալ ցավը, դեմքի, ձեռքերի կամ ոտքերի այտուցը,
• մարմնի ջերմաստիճանի բարձրացումը՝ 37,5-ից ավելի,
• պտղի շարժումների բացակայությունը՝ 12 ժամից ավելի։

Չնայած հղիությունը համարվում է օրգանիզմի ֆիզիոլոգիական վիճակ, բայց, ցավոք, շատ կանանց մոտ այն լարվածության և ծանրաբեռնվածության շրջան է, և միայն քիչ դեպքերում է ընթանում առանց տարբեր աստիճանի արտահայտված ֆունկցիոնալ և օրգանական խանգարումների, որոնք հսկողություն և բուժում են պահանջում: