Ապրիլի 30-ին Մոր և մանկան առողջության պահպանման գիտահետազոտական կենտրոնում տեղի ունեցավ «Շարժողական խանգարումներ հղիության ընթացքում» և «Քնի խանգարումներև Էպիլեպսիայի վարումը հղիության ընթացքում» թեմաներով ամփոփիչ գիտագործնական սեմինարը։

Այն թվով 4-րդն էր, որի շրջանակում զեկուցումներով հանդես եկան ՀՀ ԱՆ Առողջապահության ազգային ինստիտուտի գիտության գծով փոխտնօրեն, «Սոմնուս» նյարդաբանական կլինիկայի ղեկավար, նյարդաբան Սամսոն Խաչատրյանն ու Պարկինսոնի հիվանդության և այլ շարժողական խանգարումների մասնագետ Զարուհի Թավադյանը։

«Մարգարյան ծննդատուն» ՄՄԱՊԳՀԿ կլինիկայի ղեկավար, բ․գ․դ․ Արմեն Բլբուլյանն իր խոսքում ասաց, որ գիտագործնական սեմինարները նպատակաուղղված են ոչ միայն մանկաբարձ-գինեկոլոգների համար, այլ նաև հարակից մասնագետների, որոնք կենտրոնի բժիշկների հետ կիսվում են ամենավերջին նորություններով։

«Հղիությունը միակ վիճակն է, որտեղ կնոջ օրգանիզմում բոլոր օրգան-համակարգերը շատ ինտենսիվ են ընդգկրկված։ Դրա համար բժշկագիտության ոլորտի բոլոր մասնագիտություններն, ինչ խոսք, ունեն իրենց տեղը մեր ախտաբանություններում, և բոլոր հարցերը պետք է լուսաբանվեն»,- ընդգծեց Ա․ Բլբուլյանն ու հավելեց, որ սեմինարները շարունակական են լինելու, իսկ թեմաները՝ բազմապիսի և շատ հետաքրքիր։

Զարուհի Թավադյանն ասաց,- «Խոսել եմ հղիության ընթացքում հանդիպող շարժողական խանգարումների մասին։ Այն շատ կարևոր և արդիական թեմա է։ Բարեբախտաբար, խնդիրն հաճախ հանդիպող ախտաբանություն չէ, բայց, ամեն անգամ խնդրին բախվելիս, բժիշկները երկընտրանքի առաջ են կանգնում՝ ինչպե՞ս բուժել, քանի որ հղիության ընթացքում շատ հետազոտություններ անցկացնելն ու դեղեր կիրառելը ցանկալի չեն։ Ուստիև, անգամ հազվադեպ հանդիպող դեպքերում, բավականին բարդ է կողմնորշվելը՝ առանց հավելյալ գիտելիքների պաշարի»։

Սամսոն Խաչատրյանն իր ելույթի ժամանակ խոսեց հղիության ընթացքի վրա էպիլեպսիայի և քնի տարբեր խանգարումների ազդեցության մասին։

«Բժիշկների հետ խոսել եմ հղիության ընթացքում քնի խանգարումների և Էպիլեպսիայի վարման թեմայի շուրջ։ Երկուսն էլ ժամանակակից նյարդաբանության լուրջ խնդիրներից են։ Օրինակ՝ քնի խանգարումները մուլտիդիսցիպլինար ոլորտ է, որն իր մեջ շատ այլ մասնագիտական ոլորտներ է ներառում։

Կարծում եմ այս սեմինարի գլխավոր գաղափարը մասնագետների միջև կամուրջ ստեղծելն ու կապն ամրապնդելն է»։

Միացե՛ք մեր ֆեյսբուքյան էջին՝ գիտական միջոցառումները բաց չթողնելու համար։