Մարգարյան ծննդատանը տեղի ունեցավ բ.գ.թ., ուլտրաձայնային ախտորոշման բժիշկ, Պտղի բժշկության միջազգային հիմնադրամի (FMF) հավաստագրված մասնագետ Կարինե Օթարյանի դասախոսությունը։

-Այսօր ես և իմ գործընկերները քննարկեցինք նախածննդյան սկրինինգի ռազմավարությունը։

Նախածննդյան սկրինինգը ներառում է պտղի արատների և քրոմոսոմային անոմալիաների նախածննդյան ախտորոշում, ինչպիսին է Դաունի համախտանիշը, որն ամենատարածված պաթոլոգիաներից է:

Այս ախտորոշումը առանցքային տեղ է զբաղեցնում և ռազմավարական ուղղություն է ցանկացած պետության համար, քանի որ այն ընկած է առողջ սերնդի ձևավորման հիմքում, իսկ առողջ սերունդը առողջ ազգի հիմքն է։

Ես շատ ուրախ եմ լինել այստեղ՝ Երևան քաղաքի հնագույն բժշկական հաստատություններից մեկում, և հույս ունեմ, որ ապագայում արդյունավետ համագործակցություն կլինի։

«Մարգարյան ծննդատուն» ՄՄԱՊԳՀԿ կլինիկայի ղեկավար, բ․գ․դ․, պրոֆեսոր Արմեն Բլբուլյան.

-Այսօր գիտական բժշկությունը զարգանում է շատ արագ և դինամիկ։

Կարևոր է նշել, որ նոր տվյալները երբեմն կարող են հակասել նախկինում հաստատված սկզբունքներին:

Նախկինում պտղի նախածննդյան սկրինինգի ժամանակ հիմնական գործոններն էին քթի ոսկորները, օձիքային հատվածը և այլ պարամետրեր, որոնց վրա մենք հիմնվում էինք հղիության առաջին և երկրորդ եռամսյակներում:

Այնուամենայնիվ, այժմ կարող են ի հայտ գալ նոր գործոններ, որոնք մարտահրավեր են նետում այս հիմքերին:

Այսպիսով, ամեն ինչ փոխվում է, և արտերկրից ժամանած մասնագետների յուրաքանչյուր այցելություն՝ մեծ փորձով և խորը գիտելիքներով, փորձի փոխանակման արժեքավոր հնարավորություն է։

Այս համագործակցությունը կօգնի մեզ մշակել նոր, ժամանակակից մոտեցումներ, ինչպես նաև օբյեկտիվ և հիմնարար սկզբունքներ, որոնց վրա մենք կարող ենք հիմնվել: