1. Ի՞նչ է դաշտանադադարը և ե՞րբ է այն սկսվում:

Դաշտանադադարը դա կնոջ վերարտադրողական ֆունկցիայի անկման բնականոն գործընթաց է, որը սովորաբար սկսվում է 45-50 տարեկանում, բաղկացած է մի քանի փուլերից և տևում է մոտավորապես 10 տարի։

2. Ի՞նչ փուլեր ունի:

Առաջինը՝ նախադաշտանադադարային  (պրեմենոպաուզալ) շրջանն է: Սկսվում է 40-45 տարեկան հասակում և տևում է մինչև դաշտանի լրիվ դադարը: Այն սովորաբար բնորոշվում է դաշտանային ցիկլի անկայունությամբ։

Հաջորդը՝ ինքնին դաշտանադադարն է (մենոպաուզա). դաշտանի բացակայություն մեկ տարվա ընթացքում։

Եվ հետդաշտանադադար (պոստմենոպաուզա)՝ դա այն շրջանն է, որը սկսվում է վերջին դաշտանից մեկ տարի անց։

3. Որո՞նք են ամենատարածված ախտանշանները:

Դաշտանադադարի ամենատարածված ախտանշաններն են՝

• Հանկարծակի ջերմության զգացում կրծքավանդակում, պարանոցի և դեմքի շրջանում, որոնք զուգակցվում են հաճախացած  սրտխփոցներով և առատ քրտնարտադրությամբ
• Անքնություն
• Անտարբերություն
• Քաշի ավելացում
• Նյարդայնություն
• Դեպրեսիա
• Հեշտոցի լորձաթաղանթի չորություն, ցավոտություն ու ցածր բավարարվածություն սեռական հարաբերության ժամանակ և այլն:

4. Արդյո՞ք նորմալ են տրամադրության փոփոխությունները դաշտանդադարի շրջանում:

Տրամադրության փոփոխությունները կլիմակտեր շրջանում բավականին տարածված երևույթ է։ Էստրոգենի և պրոգեստերոնի (կանանց սեռական հորմոնների) կտրուկ անկման պատճառով առաջանում է դյուրագրգռություն, լացկանություն, անհանգստություն և անտարբերություն:

5. Ի՞նչ հետազոտություններ է ցանկալի անցնել դաշտանդադարի շրջանում:

45 տարեկանից բարձր բոլոր կանանց խորհուրդ է տրվում տարին երկու անգամ անցնել կանխարգելիչ գինեկոլոգիական զննումներ: Այցի ժամանակ բժիշկը գնահատում է բուժառուի առողջական վիճակը և նշանակում անհրաժեշտ գործիքային և լաբորատոր հետազոտությունները: Զննման արդյունքները կօգնեն ճշգրիտ բացահայտել վերարտադրողական համակարգի խանգարումները և բացառել դաշտանադադարի ընթացքում առաջացող վիճակները (օստեոպորոզ, սրտանոթային հիվանդություններ և այլն): Անհրաժեշտության դեպքում գինեկոլոգը կարող է նշանակել համապատասխան բուժում՝ դաշտանադադարի ախտանշանները կանխելու և նվազեցնելու համար:

6. Դաշտանադադարը ինչպիսի՞ ազդեցություն  ունի ոսկրային հանքային խտության վրա (օստեոպորոզի ռիսկ):

Օստեոպորոզը դաշտանադադարի ընթացքում զարգանում է էստրոգենի մակարդակի կտրուկ նվազման պատճառով, խաթարվում է ոսկրային հյուսվածքի ձևավորման և քայքայման միջև հավասարակշռությունը,  առաջանում է կալցիումի կորուստ , արդյունքում նվազում է ոսկրային զանգվածը: Օստեոպորոզը հատկապես արագ է զարգանում դաշտանադադարի առաջին տարիներին: Այն չունի ակնհայտ ախտանիշներ, սակայն մեծանում է կոտրվածքների ռիսկը: Ոսկորները դառնում են ավելի փխրուն:

7. Դաշտանադադարի ընթացքում ինչպիսի՞ կենսակերպ է խորհուրդ տրվում կնոջը:

Կնոջ առողջության պահպանման համար կարևոր դեր ունի ճիշտ կազմակերպված կենսակերպը: Ահա մի քանի հիմնական առաջարկություններ՝ դաշտանադադարի շրջանում առողջ և հավասարակշռված կենսակերպ պահպանելու համար:

Սնունդ.

Ավելացրեք կալցիումով (կաթնամթերք) և մագնեզիումով հարուստ սննդամթերքների օգտագործումը, ներառյալ ճարպոտ ձուկը, բանջարեղենը և մրգերը: Սահմանափակեք աղի, շաքարի, ալկոհոլի, կոֆեինի և կծու սննդի օգտագործումը:

Վիտամիններ և հավելումներ.

50 տարեկանից բարձր կանանց խորհուրդ է տրվում օրական ընդունել 1200 մգ կալցիում և 800-1000 ՄՄ վիտամին D+ K2՝ օստեոպորոզի կանխարգելման համար:

Ֆիզիկական ակտիվություն.

Ֆիզիկական ակտիվությունը օգնում է պայքարել ջերմության զգացումի, սթրեսի և ավելորդ քաշի դեմ (վարժական թերապիա, յոգա, պիլատես, քայլք):

Առողջություն և խնամք.

Հեշտոցային չորության դեպքում օգտագործեք խոնավեցնող քսանյութեր, խորհրդակցեք գինեկոլոգի հետ հորմոնալ փոխարինող թերապիայի (ՀՓԹ) կամ բուսական դեղամիջոցների վերաբերյալ:

Առողջության մոնիթորինգ.

Տարին երկու անգամ անցեք կանխարգելիչ գինեկոլոգիական զննումներ:

Հոգեհուզական վիճակի շտկում.

Հոգեթերապիա, հանգիստ, առողջ քուն: