Կանայք, սովորաբար, զգույշ են հղիության ընթացքում, սակայն վնասվածքներից ոչ ոք ապահովագրված չէ․․․

Այո՛, թեպետ կանայք բավականին զգույշ և ուշադիր են հղիության ընթացքում,  սակայն  կանխատեսել ամեն ինչ կյանքում հնարավոր չէ, և, հետևաբար, վայր ընկնելը նույնպես լիովին բացառելն անհնարին է: Եվ, բնականաբար, վայր ընկնելը միշտ էլ առաջացնում է  տագնապ, որը հղիների մոտ կրկնապատկվում է:

Ի՞նչ կարևորություն ունի մարմնի վնասման հատվածը՝ ընկնելիս։

Շատ կարևոր է, թե մարմնի որ  մասի վրա է հղի կինն ընկել, եթե որովայնի, այդ դեպքում պետք է կտրուկ չբարձրանալ և չփոխել մարմնի դիրքը: Անհրաժեշտ է որոշ ժամանակ նստել, ապա զգուշորեն բարձրանալ և կանգնել, ցանկալի է՝ բռնվելով որևէ ամրությունից կամ հենվելով դրան:

Որքան՞վ է պտուղը պաշտպանված արտաքին հարվածների ազդեցությունից։

Մեխանիկական գործոններից պտղին պաշտպանում են  հարպտղաջրերը, պտղաթաղաթները, արգանդի էլաստիկ մկանունքը, որովայնի խոռոչի պատերը, իսկ փոքր ժամկետներում նաև՝ կոնքի ոսկրային հենքը:

Ինչպիսի՞ հետևանքներ կարող է ունենալ տրավման հղիության ընթացքում։

Երբեմն, հատկապես 5-րդ ամսվանից հետո, կարող են առաջանալ հետևանքներ որովայնի վրա ընկնելու արդյունքում, դրանք են.

• արյունային արտադրություն՝ սեռական ուղիներից (ընկերքի շերտազատման պատճառով),
• կծկանքային ցավե՝ր որովայնի շրջանում,
• պտղաջրերի առկայություն՝  արտահոսք:

Այդ դեպքերում կինը հրատապ  պետք է դիմի կլինիկա, որտեղ՝ կախված իրավիճակից, կկազմակերպվեն բոլոր անհրաժեշտ միջոցառումները:

Սթրեսային իրավիճակից կարող է առաջանալ սրտխփոց, դող,  գլխապտույտ, տագնապի զգացում, այդ դեպքերում  կարելի է ընդունել բուսական հիմքով հանգստացնող դեղեր:

Ձեր խորհուրդը հղիներին՝ տրավմայից խուսափելու համար

Իմ խորհուրդն է՝ հետևել հետևյալ նախազգուշական միջոցներին.

• զերծ մնալ միայնակ, երկարատև քայլելուց,
• զստիճանների վրա բռնվել բազրիքներից, հենվել ամբողջական ոտնաթաթի վրա,
• կրել հարմար կոշիկներ՝ առանց բարձր կրունկների,
• միշտ փորձել ձեռքերն ազատ պահել,
• ընկնելիս փորձել կառավարել մարմինը՝ հնարավորին աշխատել ընկնել կողքի կամ ազդրի վրա,
• ընկելիս կտրուկ չբարձրանալ, մի քանի վայրկյան հանգստալ, այնուհետև զգուշորեն բարձրանալ։