Որոշ մարդիկ կարծում են, թե սպորտն ու լակտացիան անհամատեղելի հասկացություններ են։ Կարծես թե ֆիզիկական ծանրաբեռնվածությունը կարող է բացասաբար ազդել կրծքի կաթի որակի և քանակի վրա։ Կոտրում ենք այս միֆերը և բացատրում..., թե ինչո՞ւ չափավոր սպորտով զբաղվելը ո՛չ միայն անվտանգ է, այլև օգտակար` կրծքով կերակրման ընթացքում։

Ինչո՞ւ է սպորտը օգտակար կրծքով կերակրման ընթացքում:

Հղիության և ծննդաբերության ընթացքում կնոջ օրգանիզմում տեղի են ունենում փոփոխություններ, որոնք բացասաբար են ազդում նորաթուխ մոր ֆիզիկական կերպարի վրա․

• Քաշի ավելացում։ 9 ամսում կինը ավելացնում է ո՞չ միայն երեխայի աճի պատճառով, այլև այտուցվածության, ավելին ուտելու և պտղաջրերի հաշվին։
• Ճարպաշերտերի աճ։ Առավել նկատելի է որովայնի, ազդրերի, նստատեղի հատվածում՝ կապված հորմոնալ փոփոխությունների հետ։
• Մաշկի ձգում։ Հնարավոր չէ ամբողջովին կանխել որովայնի ու ազդրերի վրա ձգվածքների առաջացումը, ինչը կապ ունի նաև գենետիկայի հետ։
• Կեցվածքի վատացում։ Աճող որովայնը մեծ ծանրաբեռնվածություն է տալիս ողնաշարին, առաջացնում մեջքի ցավ և ծռվածություն։
• Կոնքոսկրերի լայնացում։ Բնական գործընթաց է, որն ավելի հեշտ է դարձնում ծննդաբերությունը։
• Ոսկրային զանգվածի կորուստ։ Հղիության ընթացքում սննդակարգում կալցիումի պակասի դեպքում երեխան այն ստանում է մոր օրգանիզմից, ինչի հետևանքով առաջանում են խնդիրներ ատամների, եղունգների և ոսկրերի հետ։

Այս փոփոխությունները ժամանակավոր են և հնարավոր է վերականգնել ֆիթնեսի միջոցով՝ ծննդաբերությունից հետո առաջին տարում, նույնիսկ կրծքով կերակրման ընթացքում։

Ինչպե՞ս հասկանալ, որ օրգանիզմը պատրաստ է մարզումներին:

Ծննդաբերությունից հետո վերականգնման շրջանը, ինչպես նաև` հղիությունը, անհատական է։ Ոմանք 9 ամսում անգամ չեն զգում ոսկրային ցավեր, իսկ մյուսների համար դժվար է անգամ տան ներսում քայլելը` մեջքի կամ կոնքի ցավերի պատճառով։ Ուստի մինչև մարզվելը կերակրող մայրերը պետք է համոզվեն, որ դա անվտանգ է։ Առնվազն պետք է ապահովված լինի հետևյալը․

• ծննդաբերությունից անցել է 4–6 շաբաթ,
• ավարտվել են հետծննդյան արտադրությունները,
• հեռացվել են կարերը,
• գինեկոլոգը թույլատրել է։

Սա վերաբերում է բնական ճանապարհով ծննդաբերած կանանց։ Կեսարյան հատումով ծննդաբերած մայրերը պետք է սպասեն, մինչև սպիները լիովին բուժվեն։

Ո՞ր սպորտաձևն ընտրել:

Կրծքով կերակրման ընթացքում հարմար են գրեթե բոլոր թեթև սպորտաձևերը․

• քայլք,
• լող,
• յոգա,
• աերոբիկա։

Այս սպորտաձևերը թույլ են տալիս մարզվել ինչպես միայնակ, այնպես էլ` խմբային։ Կան նաև խմբեր, որտեղ մարզումները լինում են երեխայի հետ։

Պետք է խուսափել այնպիսի մարզաձևերից, ինչպիսիք են ըմբշամարտը, բասկետբոլը, բռնցքամարտը, քանի որ դրանք մեծացնում են կրծքի վնասման ռիսկը։ Ցանկալի չէ նաև վազքը, ցատկերը և այն վարժությունները, որոնց ժամանակ կուրծքը ուժեղ տատանվում է։ Լավագույն «ծանրաձողը» այս շրջանում սեփական մարմնի քաշն է․ խուսափեք ծանրաձողերից և գանտելներից։

Ի՞նչ հաճախականությամբ մարզվել:

Սպորտը պետք է սկսել զբաղվել աստիճանաբար։ Սկսեք շաբաթական 3 անգամ կեսժամանոց մարզումներից։ Հետևեք ինքնազգացողությանը․ եթե շատ եք հոգնում, նվազեցրեք ծանրաբեռնվածությունը։

Կանոնավորությունն ու տևողությունը յուրաքանչյուր կերակրող մայր կարող է ընտրել ինքնուրույն կամ ֆիթնեսի մարզիչի օգնությամբ՝ կախված իր պատրաստվածության մակարդակից ու ինքնազգացողությունից։

Ո՞ր միֆերն են ստիպում մայրերին հրաժարվել սպորտից

2020 թվականին ամերիկյան Refinery29 պորտալում հրապարակվեց հոդված` ամենատարածված հարցերի մասին։ Բժիշկ, մանկաբարձ-գինեկոլոգ Շարման Լին Ռիդը նշել է, որ եթե մայրը լրացնում է մարզման ընթացքում ծախսված կալորիաները, ապա կարող է զբաղվել ցանկացած ինտենսիվությամբ։ Կարևոր է խմել շատ ջուր և լսել մարմնին՝ անհրաժեշտության դեպքում կանգ առնել կամ փոխել վարժությունների ձևաչափը։ Այդ դեպքում սպորտը վնաս չի տա ո՛չ մորը, ո՛չ էլ երեխային։

Միֆ №1․ Կաթնաթթու

Սպորտի ժամանակ մկաններում և արյան մեջ կուտակվում է կաթնաթթու։ Սա բնական գործընթաց է և ոչ մի կերպ չի ազդում կրծքի կաթի վրա։ Եթե մարզվել նորմալ տեմպով, ապա մեկ ժամում կաթնաթթվի հետքերն անհետանում են։

Միֆ №2․ Երեխան կհրաժարվի կրծքից

Կարծում են, որ կաթնաթթուն կաթին դառնություն է տալիս։ Իրականում պատճառը կարող է լինել սովորական հիգիենան․ երեխային կարող է դուր չգալ քրտինքի աղի համը։ Ուստի մարզումից հետո պարտադիր լողացեք և լվացեք կուրծքը։

Միֆ №3․ Կաթը կպակասի

Սա վերաբերում է այն կանանց, որոնք սպորտով զբաղվում են, բայց չեն ապահովում ջրային ռեժիմ և հավասարակշռված սնունդ։ Մարզումների ժամանակ օրգանիզմից շատ հեղուկ է դուրս գալիս քրտինքի միջոցով, և այն պետք է լրացնել ջրով։ Անհրաժեշտ է նաև ճիշտ հաշվարկել կալորիաները և ապահովել օգտակար սնունդ։

Դուք ոչ ձեզ, ոչ էլ երեխային չեք վնասի, եթե ընտրեք համապատասխան սպորտաձև ու տեմպ, պահպանեք սննդակարգը և ջրային հավասարակշռությունը։ Չափավոր ֆիզիկական ծանրաբեռնվածությունը, ընդհակառակը, կօգնի վերականգնել օրգանիզմը և նպաստել երեխայի ֆիզիկական զարգացմանը։ Երեխայի առողջությունը անմիջականորեն կախված է մոր առողջությունից։