Չզարգացող հղիությունը վիճակ է, որի ժամանակ դադարում է (սառեցվում է) պտղի զարգացումը: Այդպիսի հղիությունների մոտավորապես 80%-ն ի հայտ է գալիս առաջին եռամսյակում (մինչև 12 շաբաթականը): Դա հղիության անկրելիության տարբերակներից է: Բոլոր հղիությունների մոտավորապես 20%-ն ընդհատվում են կամ ինքնուրույն վիժումներով (51%), կամ չզարգացող հղիությամբ (49%):  

Պտղի զարգացման կանգի ժամանակ առաջին 2 շաբաթում լինում է ինքնուրույն վիժում 61% դեպքերում: 39% դեպքերում պտղաբջիջը մնում է արգանդի խոռոչում: Արգանդի ախտաբանական իներտությունը մի քանի պատճառ ունի. ձևավորվող պլացենտայի ուժեղ ամրացումն` արգանդում, արտամղման իմուն ռեակցիաների անլիարժեքությունը, արգանդի կծկողական ֆունկցիայի նվազումը:
Հղին առաջին 12 շաբաթում զգում է սրտխառնոցի, փսխման, հիպերսալիվացիայի, կրծքագեղձերի պնդացման անհետացում: Պտղի մահից 2 շաբաթ անց կարող են լինել արյունային արտադրություններ:

Չզարգացող հղիության ախտորոշումը

Ախտորոշումն իրականացվում է անամնեզի, բժիշկ-գինեկոլոգի զննման, ուլտրաձայնային հետազոտության և լաբորատոր թեստերի (խորիոգոնիկ գոնադոտրոպինը` դինամիկայում, էստրիոլ և այլն) հիման վրա:

Սառեցված հղիության պատճառները

Պատճառները լիովին բացահայտված չեն, բայց համարվում է, որ պատճառ կարող են լինել.

• էմբրիոնի գենետիկ և քրոմոսոմային անոմալիաները,
• էնդոմետրիումի (արգանդի լորձաթաղանթի) կառուցվածքային և ֆունկցիոնալ վիճակը, նրա անլիարժեքությունը և անընդունակությունն` ապահովելու հղիության զարգացման գործընթացները՝ քրոնիկ, աուտոիմուն, էնդոմետրիտ,
• արյան մակարդելիության խանգարումը՝ բնածին թրոմբոֆիլիա և հակաֆոսֆոլիպիդային համախտանիշ, հիպերհոմոցիստեինեմիա
• սեռական օրգանների անատոմիական շեղումներ. արգանդի բնածին դեֆեկտներ, սուբմուկոզային միոմա, ներարգանդային սինեխիաներ (կպումներ), իստմիկո-ցերվիկալ անբավարարություն,
• այլ պատճառներ, որոնք պահանջում են իմունիտետի խորացված հետազոտություն:
  
  

Հետազոտությունները և անհրաժեշտ միջոցառումները

Քանի որ 40% դեպքերում չզարգացող հղիությունների ժամանակ ինքնուրույն ընդհատում չի իրականանում, անհրաժեշտ է միջամտություն:  Ընդունված է համարել, որ սառեցված հղիությանը միշտ ուղեկցում է արգանդի լորձաթաղանթի քրոնիկ բորբոքմումը:  Բացի այդ, մեռած, նեկրոզված հյուսվածքների երկարատև առկայությունն` արգանդում, կարող է առաջացնել արյան մակարդելիության խանգարում և արյունահոսություն:

Արգանդի խոռոչի ամենաարդյունավետ մաքրումը` մինչև 10-12 շաբաթականը, վակուումային ասպիրացիան է, որն անվտանգ է և քիչ տրավմատիկ:

Կիրառվում է նաև դեղորայքային աբորտը: Վակուումային ասպիրացիան կատարվում է ամբուլատոր պայմաններում` ներերակային ցավազրկմամբ: Դրանից հետո ստացված հյուսվածքների հետազոտությունները՝ հյուսվածաբանական, իմունահյուսվածաքիմիական, բջջագենետիկ, օգնում են հասկանալ անհաջող հղիության պատճառները:

Արգանդը մաքրելուց հետո անհրաժեշտ է իրականացնել հետևյալ միջոցառումները.

• էնդոմետրումի անհապաղ բուժում,
• արգանդի լորձաթաղանթի (1-3 ամիս) կառուցվածքային-մետաբոլիկ խանգարումների պարտադիր վերականգնում, նաև ֆիզիոթերապևտիկ բուժման տարբեր մեթոդներ, հորմոնալ միջոցներ, իմունային խանգարման վերականգնում,
• մանրակրկիտ հետազոտություններ,
• նախապատրաստում` հաջորդ հղիությանը: