Ո՞ր դեպքերում է ախտորոշվում անպտղություն:

Անպտղություն ախտորոշվում է, երբ կինը մեկ տարի կանոնավոր սեռական կյանքից հետո, առանց հակաբեղմնավորիչների օգտագործման, չի հղիանում: Սեռական կյանքը համարվում է կանոնավոր, եթե սեռական հարաբերությունների հաճախականությունը շաբաթը 2 անգամ և ավելի է:

Որքա՞ն հաճախ է զույգերի մոտ անպտղություն ախտորոշվում:

Առողջապահության համաշխարհային կազմակերպության (ԱՀԿ) տվյալներով անպտղությունն աշխարհում հանդիպում է զույգերի 8-17 տոկոսի մոտ (մոտավորապես 60-80 մլն ընտանիք):

Ինչպիսի՞ն է տոկոսային հարաբերությունը կանանց և տղամարդկանց մոտ:

Կարծիք կա, որ անպտղությունն առավելապես դիտվում է կանանց կողմից առկա խնդիրների հետևանքով: Իրականում կանանց և տղամարդկանց մոտ այն հավասարապես է արտահայտված: Բոլոր դեպքերում, պետք է չկենտրոնանալ միմյանց մեղադրելու վրա, պարզապես հարկ է ժամանակին դիմել մասնագետի:

Որո՞նք են կանանց մոտ անպտղության պատճառները:

Կանանց անպտղությունը 25-35% դեպքերում պայմանավորված է արգանդի փողերի անանցանելիությամբ: Արգանդի փողերը զգայուն են տարած վարակների, որովայնի խոռոչի վիրահատական միջամտությունների նկատմամբ:

Անպտղության կարևոր պատճառ է կնոջ տարիքը, քանի որ ժամանակի ընթացքում տուժում են ձվաբջիջների որակը և քանակը:

Պատճառներից է նաև էնդրիոմետրիոզը, որի ախտորոշման դեպքում կանանց 30-50 տոկոսի մոտ դիտվում է անպտղություն:

Անպտղությանը նպաստում են նաև հորմոնալ խանգարումները, որոնք երբեմն ձվարանների պոլիկիստոզի կամ այլ ախտաբանական վիճակների արդյունք են:

Կարևոր դեր ունեն նաև արգանդի բնածին ախտաբանությունները. արգանդում միջնապատի առկայություն, երկեղջյուր կամ երկակի արգանդ, Մայերի, Կուստերի, Խաուզերի համախտանիշներ և այլն:

Անպտղություն դիտվում է նաև ֆիբրոզ ուռուցքների, տարբեր մետաբոլիկ խանգարումների (ճարպակալում, շաքարային դիաբետ, վահանագեղձի դիսֆունկցիա), հոգեբանական խնդիրների դեպքերում:

Որո՞նք են տղամարդկանց մոտ անպտղության պատճառները:

Տղամարդկանց մոտ անպտղության ամենաշատ տարածված պատճառը սպերմատոզոիդների արտադրման խնդիրներն են: Չնայած բեղմնավորման համար բավական է միայն մեկ սպերմատոզոիդ, սակայն ձվաբջջի թաղանթը քայքայելու համար անհրաժեշտ է մի քանի սպերմատոզոիդների ֆերմենտների ազդեցությունը: Հղիության համար սերմնահեղուկի խտությունը պետք է բավարար չափով լինի՝ սպերմայի յուրաքանչյուր մլ-ում 15 մլն-ից ոչ պակաս սպերմատոզոիդ:

Անպտղության պատճառներից է օբտուրացիոն խնդիրը, երբ տուժում է սպերմատոզոիդի շարժունակությունը: Պատճառ կարող է լինել իմուն համակարգը, երբ տղամարդու մոտ արտադրում է սպերմատոզոիդներին ոչնչացնող հակամարմիններ:

Անպտղության պատճառ է նաև կնոջ և տղամարդու անհամատեղելիությունը. երբեմն կնոջ օրգանիզմում արտադրվող հակամարմինները սպանում են զուգընկերոջ կողմից արտադրվող սպերմատոզոիդներին, սակայն այլ զուգընկերների պարագայում և՛ կինը, և՛ տղամարդը կարող են երեխաներ ունենալ:

Ինչպիսի՞ հետազոտություններ են անհրաժեշտ անպտղությունը հաստատելու համար:

Շատ կարևոր է կնոջ և տղամարդու համատեղ հետազոտությունը:
Առաջին էտապում իրականացվում են ընդունված մեթոդներ՝ ձվազատման խանգարումները, փողային և պերիտոնեալ գործոնները, գինեկոլոգիական հիվանդությունները, հորմոնալ խնդիրները հայտնաբերելու համար: Իրականացվում են նաև ГСГ, սպերմագրամա:

Երկրորդ էտապում իրականացվող հետազոտությունները կախված են տվյալ զույգի մոտ հայտնաբերված խնդիրներից:

Պետք է հիշել, որ անպտղությունը հնարավոր է բուժել: Հատկապես վերջին տարիներին բուժման մեթոդներն այնպիսի զարգացում են ապրել, որ հնարավոր է անպտուղ զույգին օգնել անգամ ամենադժվար վիճակների դեպքում: