Խոսենք օրգանիզմի համար վիտամին Դ-ի նշանակության մասին:

Վիտամին Դ-ն օրգանիզմի համար ունի մի շարք կարևոր գործառույթներ` ներարգանդային կյանքում նպաստում է պտղի և նրա իմուն համակարգի զարգացմանը, նպաստում է կալցիումի (Ca), ֆոսֆորի (P) յուրացմանը, որոնք անհրաժեշտ են ոսկրերի, ատամների, եղունգների համար, կարգավորում են օրգանիզմի նյութափոխանակությունը, գլյուլոզայի մակարդակը, նպաստում են որոշ հորմոնների և արյան բաղադրիչների սինթեզին, խթանում են նեյրոնների միջև իմպուլսի փոխանցմանը:

Որո՞նք են վիտամին Դ-ի բնական աղբյուրները:

Վիտամին Դ-ի բնական աղբյուր են մի շարք սննդամթերքներ`ձվի դեղնուցը, ձկնեղենի որոշ յուղոտ տեսակներ, սնկերը, ինչպես նաև վիտամին Դ-ով հարստացված մթերքները:

Բնական աղբյուր են նաև արևի ճառագայթները, սակայն պետք է խուսափել անմիջապես արևի ուղիղ ճառագայթների տակ գտնվելուց:

Խորհուրդ է տրվում օրգանիզմի անհրաժեշտ չափաբաժինն ապահովելու համար չբավարարվել միայն բնական ճանապարհով պաշար կուտակելով:

Վիտամին Դ-ի դոզայի փոփոխությունը կախված չէ տարվա եղանակից, քանի որ նույնիսկ ամռան ամիսներին արևի միջոցով հնարավոր չէ ապահովել օրվա պահանջը:

Ի՞նչ չափաբաժնով է նշանակվում վիտամին Դ-ն նորածիններին՝ կանխարգելիչ և բուժական նպատակներով:

Վիտամին Դ-ն խորհուրդ է տրվում նորածնի մոտ սկսել կյանքի առաջին շաբաթից ՝ 500 ՄՄ չափաբաժնով: Բուժիչ չափաբաժինն սկսվում է 1000 ՄՄ-ից և նշանակվում է անբավարարության նշանների ի հայտ գալու պարագայում:

Որո՞նք են  վիտամին Դ-ի անբավարարության նշանները:

Վիտամին Դ-ի անբավարարության նշաններն են՝ քնի խանգարումը, գրգռվածությունը, աճի խանգարումները (և´ քաշի, և´ հասակի), առատ քրտնարտադրությունը (հատկապես քնի ընթացքում), գաղթունի փակվելու դանդաղումը:

Ի՞նչ բարդություններ կրող են լինել վիտամին Դ-ի անբավարարության դեպքում:

Երկարատև անբավարարության հետևանքով երեխաների մոտ կարող է  զարգանալ ռախիտ հիվանդությունը, որը բնորոշվում է ոսկրային հյուսվածքների փափկեցումով և դեֆորմացիայով`ոտքերի ծռվածություն, գլխի մեծ չափեր, տափակած ծոծրակ, արտացցված ճակատ և այլն: