Էկտոպիկ՝ արտարգանդային հղիությունը վիճակ է, երբ ձվաբջիջը բեղմնավորվում է ոչ թե արգանդի խոռոչում, այլ նրա փողերի ներսում:

Կախված բեղմնավորված ձվաբջջի ամրացման տեղակայումից` տարբերում ենք արտարգանդային հղիության հետևյալ ձևերը.

• Պարանոցային,
• Ձվարանային,
• Որովայնային,
• Կոմբինացված,
• Փողային, որն ամենատարածվածն է։

Ինչպես նշվեց, էկտոպիկ հղիության գլխավոր պատճառը ձվաբջջի բեղմնավորումն է արգանդի փողում, որի հետևանքով այն փակվում է:

Արտարգանդային հղիության հավանականությունն ավելի է մեծանում, եթե կինը դրանից առաջ արհեստական վիժում է կատարել, կամ առկա են սեռական օրգանների թերզարգացում, փոքր կոնքի օրգաններում բորբոքային խնդիրներ, ուռուցք:

Արտարգանդային հղիության 5-7-րդ շաբաթներում արգանդի փողը պատռվում է: Սկսվում է արյունահոսություն որովայնի խոռոչում, որը վտանգ է ներկայացնում կնոջ առողջության և կյանքի համար:

Ախտանշանները

Վաղ շրջանում հղիությունը ոչնչով չի տարբերվում նորմալ ընթացող հղիությունից: Լինում է դաշտանի բացակայություն, սրտխառնոց, հատկապես առավոտյան, կրծքագեղձերի մեծացում և ցավ, բազալ ջերմության աննշան բարձրացում, հաճախամիզություն:

Հիմնական բնորոշ ախտանշաններն ի հայտ են գալիս 4-րդ շաբաթից.

• Աննշան արյունային արտադրություն
• Ցավ որովայնի ստորին հատվածում, որը տարածվում է դեպի գոտկատեղ
• Ցածր զարկերակային ճնշում
• Գլխացավ, գիտակցության կորուստ

Նման ախտանշանների դեպքում անհրաժեշտ է անհապաղ դիմել բժշկի:

Ախտորոշումը
Ախտորոշման համար իրականացվում են տրանսվագինալ ՈՒՁՀ, ХГЧ որոշման համար արյան հետազոտություն:

Բուժումը
Արտարգանդային հղիության սկզբնական շրջանում՝ մինչև քսան օրը, հնարավոր է խնդիրը լուծել արհեստական փողային վիժումով /աբորտ/:

Ներքին արյունահոսության դեպքում կատարվում է վիրահատություն և հեռացվում է արգանդի վնասված փողը: Այդ դեպքում բնականաբար նվազում է կնոջ վերարտադրողականության հնարավորությունը:

Մյուս բոլոր դեպքերում իրականացվում է լապարասկոպիա:

Միայն երեք տոկոս դեպքերում է էքստիրպացիայի /արգանդի հեռացում/ անհրաժեշտություն լինում:

Գոյություն ունեն նաև բուժման քիմիոթերապևտիկ մեթոդներ, երբ նշանակվում են պտղի աճը արգելակող պատրաստուկներ:

Կանխարգելումը
Անհրաժեշտ է ժամանակին բուժել փոքր կոնքի օրգանների բորբոքային խնդիրները, ոչ ցանկալի հղիությունների դեպքում օգտագործել հակաբեղմնավորիչներ:

Իսկ հղիություն պլանավորելիս և՛ կինը, և՛ տղամարդը պետք է անցնեն բոլոր անհրաժեշտ հետազոտությունները: